Por Europa Press / Redacción | VIGO | 31/05/2021 | Actualizada ás 15:35
O presidente da Xunta, Alberto Núñez Feijóo, eludiu este luns pronunciarse sobre a presenza do PP na concentración do 13 de xuño na Praza de Colón en contra dos indultos aos presos do 'procés', aínda que sinalou que o rexeitamento a esa medida de graza non é unha cuestión "de dereitas nin de esquerdas", senón de "decencia política".
Así o trasladou, en resposta a preguntas dos medios, tras o acto de presentación da campaña turística 'Camiña a Galicia'. Feijóo evitou pronunciarse sobre se o seu partido debe ou non estar nesa concentración (aínda que o secretario xeral do PP, Teodoro García Egea, confirmou este luns que o presidente do partido, Pablo Casado, asistirá), pero proclamou que "estamos nun contexto de degradación das institucións" que "non se debe aceptar".
Respecto diso, incidiu en que "hai moita xente de partidos distintos" que se opón a eses indultos porque "isto non vai de dereitas nin de esquerdas". "Isto vai de cumprir a Constitución, de respectar as sentenzas xudiciais, e de ter un mínimo de decencia democrática e política, para non vivir de xeonllos fronte a unhas persoas que pretenden que o Goberno, o Parlamento, as Cortes e o Estado se poñan á súa disposición, cando non cren nin no Goberno, nin nas Cortes nin no Estado", proclamou.
O presidente da Xunta lamentou que España estea "nunha situación inédita nos últimos 40 anos", xa que "é a primeira vez" que un Goberno "prevé indultar a unha serie de persoas que non cumpren ningún requisito para obter esa graza", "en contra do criterio da Fiscalía e dos maxistrados do Tribunal Supremo", sen que os beneficiarios dese indulto "o solicitaran" e "sen que acrediten que non van volver a delinquir".
"E aínda por riba, é a primeira vez que se vai indultar cando a Generalitat acaba de dicir que o seu obxectivo esta lexislatura é a independencia", censurou, e engadiu: "Estamos ante un delito continuado, que supoño que requirirá que o Consello de Ministros aprobe un indulto cada semana. Fronte a un delito continuado, é necesario un indulto continuado".
Ante este escenario, Feijóo insistiu en que o rexeitamento a eses indultos "non vai nin de dereitas nin de esquerdas", senón de crer "na democracia, na independencia do Tribunal Supremo, na igualdade das sentenzas" e en poder manifestalo así, "con absoluta tranquilidade e acougo". "Creo que é o que pensan a maioría dos españois neste momento", concluíu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.