O prazo de matrícula para as escolas infantís abre este martes para os máis de 8.000 nenos admitidos
As familias deberán presentar o impreso da matrícula cos datos cubertos acompañado pola copia da cartilla de vacinación do neno.
Por E.P. | SANTIAGO DE COMPOSTELA | 31/05/2021 | Actualizada ás 17:40
As familias dos 8.235 nenos e nenas admitidos para o próximo curso 2021-2022 en escolas infantís da Xunta poderán formular a matrícula a partir deste martes 1 de xuño.
A relación de admitidos, que suman un 2% máis respecto ao actual curso, pode consultarse nas páxinas web da Consellería de Política Social e do Consorcio Galego de Servizos de Igualdade e Benestar.
O prazo para formalizar a matrícula permanecerá aberto desde este martes ata o vindeiro xoves 10 de xuño, segundo informa este luns a Administración autonómica.
As familias deberán presentar o impreso da matrícula cos datos cubertos acompañado pola copia da cartilla de vacinación do neno.
O trámite pode realizarse a través da sede electrónica da Xunta ou no propio centro no que o neno obtivese a praza para o próximo curso, que arrinca o próximo 6 de setembro.
A Xunta lembra que as familias cuxos primeiros fillos non obtivesen unha praza poden optar ao 'Bono Concilia', que outorga unha axuda directa para a súa inscrición nunha escola infantil.
