Por X.M. Fernández | Allariz | 04/06/2021 | Actualizada ás 09:45
No espazo habilitado para o desenvolvemento do evento haberá cadeiras con mesiñas, a xeito dunha gran terraza para poder gozar da poesía e da música recreando o ambiente dun bar, degustando as maridaxes ofrecidas polo establecemento Fío de Liño ou simplemente tomándolle algo.
O comezo será ás 20:00 h. coa palabra poética de Celso Fernández Sanmartín, poeta e coñecido narrador oral, que trae para a ocasión poemas do seu libro ‘Libro para a casa dos avós de Noelia de Alperiz’, “un libro que ama o abandono dunha casa que me foi presentada para ser anovada desde fóra e por dentro”, segundo expresa o propio poeta. Este libro naceu co obxectivo altruísta de axudar á reconstrución da casa dos avós dunha amiga.
A continuación haberá un concerto de Tinta imaxinaria, un dúo formado pola coñecida regueifeira e poeta Alba María e o guitarrista Queco Díaz. Trátase dun espectáculo que combina dun xeito sorprendente e orixinal como poucos a música, a poesía e a palabra improvisada a partir de libros abertos ao chou, palabras que o público pode propoñer ou estímulos do contexto inmediato.
A organización corre a cargo da Fundación Vicente Risco e colaboran, ademais do Concello de Allariz, diferentes establecementos da vila. A entrada é de balde pero prégase reservar no correo poemagosto@gmail.com ou a través do teléfono 626033867
ÉXITO DE VISITAS NA ARRINCADA DO FESTIVAL DE XARDÍNS
O Festival Internacional de Xardíns de Allariz, nos seus primeiros 15 días de apertura ao público, recibiu a visita de case 4000 persoas que se achegaron a coñecer os Xardíns da Poesía.
Logo do parón do 2020, o recinto abría as portas ao público para que coñeceran os deseños dos 10 xardíns que concursarán durante esta edición de 2021. A poesía respírase nos 37.000 m2 do espazo, no que se poderá gozar de xardíns nos que autores e autoras coma Rosalía de Castro, Fernando Pessoa, Machado, Lorca, Xela Arias ou Giacomo da Lentini están representados.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.