Por Europa Press / Redacción | Ferrol | 04/06/2021 | Actualizada ás 18:00
O secretario xeral de Infraestruturas do Ministerio de Transportes, Mobilidade e Axenda Urbana, Sergio Vázquez, presentou o proxecto de humanización e remodelación da avenida das Pías de Ferrol, para permitir unha mellor conexión entre os barrios do Ensanche, O Bertón e Caranza, e que suporá a eliminación da actual trincheira a ambas as marxes da estrada FE-14.
Esta proposta foi dada a coñecer nun acto celebrado no mediodía deste venres, 4 de xuño, no Concello de Ferrol, no que se deron cita o alcalde, Anxo Mato (PSOE) e o delegado do Goberno en Galicia, José Miñones.
O secretario xeral destacou que se trata "dunha actuación prioritaria para o Ministerio de Transportes" xa que a conversión da estrada "nunha vía urbana suporá unha notable mellora para a seguridade viaria e a humanización da súa contorna"
"Con esta actuación facemos un Ferrol mellor, facemos cidade, rompemos barreiras que dividen e gañamos espazo para as persoas", destacou o responsable do departamento que encabeza o ministro José Luís Ábalos.
GAÑAN PEÓNS E CICLISTAS
Sergio Vázquez tamén detallou que "se reducirá o espazo para os vehículos, de forma que o peón e a bicicleta gañen novas alternativas de mobilidade, xunto con zonas de esparexemento e descanso"
En canto aos prazos asegurou que "se está ultimando a redacción dos dous proxectos que compoñen a actuación", para a que está prevista a aprobación do correspondente ao tramo máis próximo a Caranza "para o mes de xuño".
A continuación, levará a cabo a licitación das obras, financiadas a través do Mecanismo de Recuperación e Resiliencia (MRR) dentro dos proxectos de mellora en contornas urbanas da Rede de Estradas do Estado cun investimento das dúas fases de 10,5 millóns de euros.
Pola súa banda, o alcalde de Ferrol mostrouse satisfeito por esta máis preto o "completar un camiño que se iniciou no 2010, cando se asinou o protocolo de colaboración entre o concello e o goberno que incluía a reurbanización da avenida das Pías".
Para o rexedor socialista, unha vez executado este proxecto "uniranse barrios moi importantes, de lugares moi diferentes, e a xeración de espazos conxuntos para que todos os cidadáns poidan gozar das mesmas infraestruturas urbanas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.