Sanidade di non ter a "culpa" de que os médicos rexeiten un contrato de 60.000 euros na Guarda
O conselleiro Julio García Comesaña asegurou que tanto a dirección da área sanitaria viguesa como a propia consellería "fan todos os esforzos" para "ofrecer un contrato de continuidade" aos médicos.
Por E.P. | SANTIAGO DE COMPOSTELA | 09/06/2021 | Actualizada ás 17:33
O conselleiro de Sanidade, Julio García Comesaña, preguntouse se é "culpa" da Administración autonómica que os médicos rexeiten os contratos de 60.000 euros anuais que ofrece para as prazas no centro de saúde da Guarda, que na actualidade só ten tres do oito facultativos que lle corresponden por persoal.
Unha situación sobre a que, durante o pleno que concluíu este mércores no Pazo do Hórreo, cuestionou ao responsable de Sanidade o deputado do BNG Manuel Lourenzo, que denunciou as "carencias" do servizo sanitario de atención primaria na localidade do sur de Pontevedra.
O conselleiro avanzou que nos "próximos días" incorporaranse ao persoal da Guarda outros tres facultativos que virían cubrir parte das cinco vacantes de médicos que existen na actualidade e que atribúe á suma de baixas, traslados e a que os profesionais non se senten atraídos pola zona para desempeñar alí a súa actividade.
Neste sentido, asegurou que tanto a dirección da área sanitaria viguesa como a propia consellería "fan todos os esforzos" para "ofrecer un contrato de continuidade" aos médicos "de ata tres anos" a razón de 60.000 euros anuais. "Se non o quere ninguén (o contrato), será culpa nosa tamén?", preguntou García Comesaña, que incidiu en que a zona ten "pouco poder de atracción" para os médicos.
HOSPITAL DE MONFORTE E ELA
O titular de Sanidade tamén tivo que responder a outras dúas preguntas formuladas pola deputada do BNG Carmen Aira e a parlamentaria do PPdeG Encarna Amigo e que estiveron centradas, respectivamente, na situación do hospital de Monforte e na entrega de equipos para pacientes dela.
Sobre o primeiro asunto, e tras as críticas da nacionalista á forma en que se articulou o dobre circuíto para diferenciar pacientes suscpetibles de padecer covid do resto no hospital comarcal do sur lugués, Comesaña defendeu que as características da medida implantada foron "consesuadas" cos profesionais do centro "antes da súa posta en marcha".
Así, aseverou que "as condicións de traballo" no Punto de Atención Continuada do hospital "foron mellores" que noutros lugares onde tamén foi necesario adaptar as instalacións para a creación do dobre circuíto, unha das medidas implantadas desde o Sergas por mor da pandemia.
En canto á pregunta do PP, Comesaña avanzou que xa se iniciou a entrega de lectores oculares para pacientes con trastornos neuromotores graves, unha repartición que se fixo efectivo unha vez entrada en vigor a instrución para as prestacións a pacientes dela e outros trastornos.
