Os futuros usos da Cidade da Cultura, a debate para trazar o plan estratéxico 2021-2027
As achegas destes expertos sobre as liñas estratéxicas actuais e desafíos de futuro que encara a Cidade da Cultura nos próximos anos complementaranse cun proceso participativo e aberto a través de 600 enquisas en liña para coñecer opinión da cidadanía.
Por E.P. | SANTIAGO DE COMPOSTELA | 10/06/2021 | Actualizada ás 14:21
Expertos e profesionais de xestión cultural centros internacionais e capitais europeas da cultura achegaron as súas reflexións e impresións sobre o complexo do Gaiás en diversas mesas de traballo, organizadas co obxectivo de recoller achegas que sirvan para trazar as liñas mestras do novo plan estratéxico para o período 2021-2027.
Un dos paneis de discusión contou coa participación do director artístico de Bios Organization (Atenas) e presidente da European Creative Hubes Network, Vassilis Charalampidis; a directora adxunta do Museu Serralves do Porto, Marta Almeida; o director do festival Le Guess Who? (Utrech), Bob Van Heur; o director de Inside Track (Liverpool), Neil Peterson; ou o director artístico de GNRation (Braga), Luís Fernandes.
Así mesmo, a segunda mesa de traballo permitiu coñecer as propostas de expertos en programación cultural tanto de Galicia como do Estado. Entre eles, o exdirector de Medialab Prado, Marcos Rodríguez, o ex-director de Matadero Madrid e director da galería Salut au Monde do Porto, Pablo Berástegui, o codirector do festival Sinsal, Luís Campos ou o director da Culturgal, Xosé Aldea.
A todos eles únese a visión de entidades privadas que habitualmente realizan labores de mecenado no ámbito das industrias creativas, como A Caixa, Viaqua ou Adegas Martín Códax, así como representantes do ámbito turístico -a través do Cluster de Turismo de Galicia- e de axencias creativas como Verve Creative Group.
PROCESO PARTICIPATIVO
As achegas destes expertos sobre as liñas estratéxicas actuais e desafíos de futuro que encara a Cidade da Cultura nos próximos anos complementaranse cun proceso participativo e aberto a través de 600 enquisas en liña para coñecer opinión da cidadanía.
O II Plan Estratéxico do Gaiás debuxará as liñas de acción para un tempo marcado pola expansión da actividade, no que figuran como principais retos o impulso ao sector cultural, a internacionalización, o papel da Cidade da Cultura como factoría de contidos para toda Galicia, ou a integración do Edificio Fontán e o apoio á investigación universitaria, especialmente no ámbito dos estudos do patrimonio.
