A Deputación de Pontevedra segue presentando en Madrid o seu proxecto de recuperación do espazo público
Segundo traslada o goberno provincial, o Ministerio de Transporte expuxo a posibilidade de incluír o proxecto "nalgunhas das iniciativas abertas pola UE" así como presentalo a candidaturas de premios "nos que tería posibilidades de recoñecemento debido á súa singularidade".
Por E.P. | SANTIAGO DE COMPOSTELA | 10/06/2021 | Actualizada ás 19:31
A Deputación de Pontevedra continúa en Madrid coa súa rolda de presentación ante as autoridades estatais do seu proxecto 'Ágora', centrado na recuperación de espazos urbanos e que aspira a entrar entre os seleccionados para recibir fondos europeos.
Tras manter un encontro o pasado miérccoles coa Dirección Xeral de Axenda Urbana da Adminstración central, o deputado Uxío Benítez presentou a idea á directora da Oficina de Estratexia de Mobilidade do Ministerio de Transportes, Mobilidade e Axenda Urbana, Ángeles Marín.
Segundo traslada o goberno provincial, o ministerio expuxo a posibilidade de incluír o proxecto "nalgunhas das iniciativas abertas pola UE" así como a presentalo a candidaturas de premios "nos que tería posibilidades de recoñecemento debido á súa singularidade".
O executivo que preside Carmela Silva resalta do seu proxecto que persegue "reverter a tendencia actual de invasión dos vehículos a motor" co horizonte do ano 2023.
Para iso, a estratexia conta cunha serie de "principios" que pivotan ao redor da concepción do espazo público como un "dereito da cidadanía" e que as persoas deben der "as primeiras beneficiarias" dun modelo que aposte pola "sustentabilidade, a inclusión, a autonomía infantil ou as mobilidades alternativas".
ACELERADORA DE COMERCIO
Por outra banda, un total de dez empresas pontevedresas foron seleccionadas para participar na segunda edición do programa de aceleración para iniciativas empresariais do sector do comercio.
As compañías --dos municipios de Pontevedra (3), Lalín (2) e Crecente, Meaño, Silleda, Vigo e Vilagarcía de Arousa-- recibirán formación en liña sobre competitividade, imaxe dixital, canvas, comercio en liña, sustentabilidade, redes sociais e finanzas.
O curso arrinca este luns 14 de xuño e concluirá a medidados do próximo mes de outubro, segundo informa a Deputación de Pontevedra.
