Por E.P. | SANTIAGO DE COMPOSTELA | 11/06/2021 | Actualizada ás 13:21
A Xunta de Galicia e o Consello de Seguridade Nuclear (CSN) estableceron un novo acordo de colaboración para planificar, implantar e manter un plan galego ante emerxencias radiolóxicas, así como para definir os mecanismos de comunicación entre ambas as administracións en caso de darse unha situación de risco.
O convenio, publicado este venres no Boletín Oficial do Estado (BOE) e recolleito por Europa Press, foi asinado o pasado mércores 2 de xuño polo presidente do CSN, Josep Maria Serena i Sender, e polo vicepresidente primeiro e conselleiro de Presidencia, Xustiza e Turismo da Xunta, Alfonso Rueda.
O acordo, que se establecerá por catro anos prorrogables a outro catro, vén renovar dous anteriores establecidos entre as dúas administracións --de 1990 e de 2012-- xa que o último deles quedou sen efecto en outubro de 2020. Segundo se desprende do texto do BOE, o Consello de Seguridade Nuclear asesorará á Xunta para elaborar o plan autonómico de emerxencias radiolóxicas e, para facelo efectivo, enumera as atribucións que terá cada institución.
Así, corresponde á Administración galega activar a situación de emerxencia radiolóxica ou, na súa falta, o Plan Territorial de Emerxencias (Platerga) para adoptar as medidas de protección da poboación. O Goberno autonómico tamén debe informar "de forma inmediata ao CSN sobre calquera accidente nuclear ou radiolóxico do que teña coñecemento que poida afectar os habitantes ou ao medio ambiente".
Ademais, a Xunta comprométese a ter en conta as recomendacións do CSN relacionadas con estas medidas de seguridade e a "intercambiar toda a información que sexa necesaria" para coordinar as actuacións a través do 112 Galicia.
Mentres tanto, as funcións que asume o Consello de Seguridade Nuclear pasan por informar as autoridades autonómicas de calquera accidente "que comporte risco" para as persoas e o medio ambiente, activar o seu propio plan de emerxencias en caso dun destes episodios, así como pór os seus recursos a disposición do operativo e informar á comunidade internacional de ser necesario.
O CSN tamén se compromete a asesorar ao director do plan de emerxencias, a dar apoio técnico e a pór en práctica as medidas de protección radiológica "necesarias para paliar as consecuencias do accidente".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.