Interveñen en catro festas en pisos en Santiago e denunciado un local por triplicar o tope de CO2
As piloto "demostra que é posible" a reapertura do lecer nocturno a xuízo do alcalde compostelán
Por Europa Press / Redacción | SANTIAGO DE COMPOSTELA | 14/06/2021 | Actualizada ás 14:54
Catro festas en pisos obrigaron a intervir este fin de semana en Santiago de Compostela, mentres que un local foi denunciado por triplicar o nivel máximo permitido de CO2, segundo informou este luns o alcalde, Xosé Sánchez Bugallo.
Con todo, Bugallo, en rolda de prensa, destacou que non houbo "demasiados incidentes" e que "o día máis complicado foi a tarde do venres" debido aos mozos que acabaron a proba de acceso á universidade ou o curso escolar.
Por este motivo "algunhas zonas da cidade" rexistraron "determinadas concentracións", en especial Porta Faxeira e esa entrada á Alameda. "Pero non teño noticias de incidentes relevantes ou significativos", resaltou o rexedor.
Neste sentido, apuntou que os datos de evolución da pandemia do coronavirus na capital galega "de momento son bos" e esperou "que non se torzan", tendo en conta que a poboación menor de 40 anos está maioritariamente sen vacinar e "é a que termina o curso e ten máis mobilidade". "Aí é onde todos temos que estar máis pendentes, especialmente eles", incidiu.
PROBA LECER NOCTURNO
Mentres, sobre a proba piloto do lecer nocturno, constatou que "tiña que saír ben porque o aforamento está limitado e controlado e as persoas que acoden, acoden mentalizadas". O que considera deste ensaio é que "demostra que é posible" a reapertura destes establecementos.
En calquera caso, asumiu que "como vaia a funcionar depende de que a xente siga igual de mentalizada" e de que os hostaleiros manteñan "un enorme control de aforamentos".
