Por E.P. | SANTIAGO DE COMPOSTELA | 14/06/2021 | Actualizada ás 16:41
A Garda Civil de Tráfico de Galicia detectou a 202 condutores con resultado positivo na proba de alcoholemia en 5.789 controis realizados entre a noite do venres 11 de xuño e a mañá domingo 13 de xuño nas estradas galegas.
Segundo destacou o Instituto Armado, 202 condutores obtiveron resultado positivo nalgunha das probas ás que foron sometidos, 43 deles pendentes da confirmación do positivo en drogas polo laboratorio de referencia, e a 21 instruíronselle dilixencias penais por superar as taxas legalmente establecidas para a comisión de delito contra a seguridade viaria, polo que teñen que comparecer nos próximos días nun xuízo rápido.
Os controis de alcol, drogas e velocidade levaron a cabo nos tramos "onde o risco de accidentes é maior e tendo en conta os fluxos de circulación ás zonas das probas piloto de lecer nocturno levadas a cabo este fin de semana na Comunidade galega", destacan as mesmas fontes.
Deste xeito, "co obxectivo de anular os avisos en aplicacións e redes sociais que alertan da posición dos puntos de verificación de alcol e drogas", subliña a Benemérita, as patrullas do Sector de Tráfico "fixeron controis breves e dinámicos en numerosas vías de comunicación", especialmente en estradas secundarias.
CONDUTOR DE TAXI
En concreto, relatan as mesmas fontes, o condutor dun taxi que realizaba un servizo foi detectado o venres ás 19,45 horas na estrada AC-221, no quilómetro 12,200, á altura de Abegondo cando facía uso dunha rede social que lle alertaba da presenza de controis na zona.
O condutor "que duplicaba amplamente a taxa permitida de 0,15 mg/l" manifestou aos axentes que "non contaba" con eles "por aquí" xa que o foro dicía que estaban os axentes "noutro punto". O vehículo quedou inmobilizado cunha taxa de 0,40 mg/l, unha sanción de mil euros e a perda de seis puntos do carné de condutor, destacou a Garda Civil. Mentres, os viaxeiros continuaron noutro taxi ata o seu destino.
RESPONSABILIDADE COMPARTIDA
Ademais, durante o venres e o sábado atendéronse numerosos sinistros viarios con feridos de diferente consideración, polo que do Sector de Tráfico da Garda Civil recomenda levar a cabo todas aquelas accións que "levan a unha mellora da seguridade viaria pois hai que lembrar que a responsabilidade na redución de accidentes é compartida por todos".
Con este tipo de dispositivos, o Sector de Tráfico da Garda Civil en Galicia quere "crear unha maior concienciación entre os condutores de que non soamente o alcol e a condución é un binomio perigoso", senón que tamén, recalca, "as drogas e a condución son en numerosas ocasións sinónimas de morte por accidente".
Para evitar estes riscos ao volante durante todo o verán, os axentes da Agrupación de Tráfico da Garda Civil intensificarán os controis sobre este factor de risco e, para iso, estableceranse diferentes puntos de control en todo tipo de estradas e a calquera hora do día, onde se realizarán probas de alcoholemia e drogas aos condutores que circulen por elas con especial atención ás zonas de lecer nocturno.
DÚAS MORTES DURANTE A FIN DE SEMANA
Urxencias Sanitarias de Galicia-061 atendeu a 80 persoas debido a 59 accidentes de tráfico rexistrados durante o pasado fin de semana na rede viaria galega, das que dúas morreron no lugar do sinistro.
Segundo informou o 061, a Central de Coordinación recibiu entre as 15,00 horas do venres 12 de xuño e as 23,59 horas do domingo 13 un total de 80 chamadas en relación con accidentes de tráfico. A xornada do con máis incidentes foi a do sábado, con 24.
O 061 mobilizou 74 recursos. En concreto, as ambulancias realizaron 62 asistencias; unha, un helicóptero medicalizado; e os equipos sanitarios de Atención Primaria prestaron asistencia en 11 accidentes. En 64 casos os feridos foron levados aos centros sanitarios correspondentes e en 14 ocasións recibiron atención no lugar do sinistro sen necesitar traslado, mentres que dúas persoas faleceron no punto do accidente.
A proporción de homes atendida ascendeu ao 60 por cento e a de mulleres reduciuse ao 40%. En canto ás idades dos asistidos, o 49% tiña decate os 20 e 34 anos. Por provincias, a de Pontevedra, con 24 accidentes, foi a que rexistrou máis accidentes durante os desprazamentos do fin de semana; seguida da da Coruña, con 20; Ourense, con oito; e Lugo, con sete.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.