Xaquín Marín, Agrupación Astronómica Ío e Twitter en galego, premios Rosalía de Castro da Deputación da Coruña

O debuxante Xaquín Marín, a Agrupación Astronómica Ío e Twitter en galego son o tres premios Rosalía de Castro, que concede a Deputación da Coruña. Estes premios están encamiñados a recoñecer a personalidades e iniciativas que traballan na promoción do galego en todos os ámbitos. O galardón está dotado con 2.100 euros por categoría.

O xurado remarca de Xaquín Marín --na categoría de persoas que destacan pola promoción do idioma galego-- "o compromiso continuado no tempo" e "alcance social do seu traballo", así como por "facer humor gráfico nun contexto histórico de especial dificultade en plena ditadura franquista e en medios de comunicación onde a presenza do galego era residual".

Pola súa banda, valora da Agrupación Astronómica Ío --na categoría de entidade-- o seu impulso ao galego "nun ámbito tan especializado como a astronomía e sen bagaxe" neste idioma, que "ademais consegue trasladar dun modo accesible e atractivo para o público xeral".

Finalmente, na categoría de proxecto concreto de dinamización lingüística para mozas, recoñece o proxecto de Twitter en galego, promovido por Carlos García Vieito para o proceso de tradución co que configurar esta plataforma social no idioma propio de Galicia. O xurado recoñece que crea "terminoloxía que permite colocar á lingua galega nunha nova realidade dixital" e resalta o seu "gran impacto" con 15.000 persoas con conta configurada en galego.

Xaquín Marín nunha foto de RafioFusión