Por E.P. | SANTIAGO DE COMPOSTELA | 15/06/2021 | Actualizada ás 17:46
A conselleira de Medio Ambiente, Territorio e Vivenda, Ángeles Vázquez, e o conselleiro de Sanidade, Julio García Comesaña, instaron a toda a poboación de Galicia a utilizar protección para evitar danos na pel por mor dos raios ultravioleta, sobre todo agora que chega o verán cunha maior exposición en praias e piscinas.
Ambos os integrantes do Goberno da Xunta realizaron este chamamento na mañá deste martes, 15 de xuño, no areal da Frouxeira, no municipio de Valdoviño, onde estiveron acompañados, entre outros, polo delegado provincial da Xunta na Coruña, Gonzalo Trenor, polo rexedor desta localidade, Alberto González (PSOE), e o coordinador de Meteogalicia, Juan Taboada, con motivo do inicio da tempada estival.
Vázquez destacou que Galicia é unha das comunidades autónomas nas que se monitora "dunha maneira máis completa a radiación solar", unha información que se pode consultar en tempo real na páxina web de Meteogalicia.
A conselleira de Medio Ambiente abundou en que "coñecer o índice ultravioleta, ou como son as radiacións que emite o sol hora a hora, é un elemento importante para determinar como organizar actividades no exterior". Todo iso para "tomar o sol dunha forma segura". Así, remarca a información que ofrece Meteogalicia por municipios.
Pola súa banda, García Comesaña incidiu en que é moi importante "tomar precaucións nas exposicións ao sol", pois "é imprescindible empregar a protección solar idónea para cada tipo de pel". Tamén insta a "tratar de evitar tomar o sol durante as horas centrais do día, dado que nese momento a radiación solar é máis perigosa".
O coordinador de Meteogalicia, Juan Taboada, detallou que a Xunta decidiu facer un seguimento deste índice e para iso instaláronse varios medidores de radiación UV tanto na zona litoral --Ribadeo, Ferrol, Pontevedra-Lourizán e Baiona-- como no interior --Cervantes --.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.