Feijóo traslada ao PPdeG o modelo do "candidato único"
Os relatorios incidirán no modelo de baixada de impostos e, en clave interna, apostarán por aumentar as vías de participación no partido
Por Europa Press / Redacción | Compostela | 17/06/2021 | Actualizada ás 12:33
A Comisión Organizadora do 17º Congreso do PPdeG, que se celebrará en xullo en Pontevedra, proclamou este xoves oficialmente a Alberto Núñez Feijóo como único candidato presidir o partido, de forma que o actual presidente da Xunta revalidará por quinta vez o seu liderado á fronte da formación da que tomou as rendas de mans de Manuel Fraga no ano 2006.
Conforme marcan os estatutos do partido, formalmente Feijóo é aínda precandidato (o único), tras comprobar a comisión organizadora que reúne as condicións, e emprenderá unha campaña interna que se prolongará as próximas semanas. Este mércores, o dos Peares entregara 6.119 avais e ningún outro militante achegou as firmas precisas unha vez expirado o prazo (finalizou, precisamente, na pasada xornada).
Na presentación da súa candidatura, Feijóo proclamou que optaba a seguir liderando a formación en Galicia pondo a súa experiencia e compromiso a disposición do seu partido. Reivindicou que se presenta non polo feito, senón "polo que queda por conseguir", pero evitou atarse a volver optar á Xunta como aspirante popular en 2024. Anticipar quen concorrerá sería, dixo, un acto de "soberbia".
Agora, dáse inicio a unha campaña interna na que, aínda que nun formato máis reducido, o candidato presentará o proxecto político que propón para os próximos anos. Como xa avanzou, farao durante a celebración de catro xuntas directivas provinciais, comezando por Ourense, o día 21 de xuño; á que lle seguirá Lugo, o día 28; A Coruña, o día 29; e por último Pontevedra, o día 6 de xullo.
REACTIVACIÓN PARA AS MUNICIPAIS
O PPdeG defende que está a organizar un conclave autonómico que será "aberto, participativo e funcional" coa vista posta non só nos equipos que saian del, senón "nas propostas de futuro que van pór a disposición de Galicia", pois o obxectivo é que sexa a Comunidade "a gran vencedora" do congreso.
Así, ademais de renovar as ideas para facer fronte aos grandes retos que ten por diante a sociedade, tamén comeza un "período de reactivación" para poder configurar un proxecto competitivo cuxo seguinte reto electoral son os comicios municipais.
De feito, o PPdeG subliña que, "a pesar de gañar eleccións", apóstase "permanentemente por mellorar", actualizando a organización todos os días para "adecuala ao que a xente espera" do PPdeG e "continuar sendo o partido que máis se parece a Galicia".
RELATORIOS ATA O 21 DE XUÑO
Por este motivo, tanto os encargados de deseñar o texto basee dos relatorios como os militantes deberán facer achegas durante estas semanas para "acertar" nun ideario que debe ser reflexo do que os galegos necesitan na próxima década.
