Por Europa Press / Redacción | Santiago de Compostela | 17/06/2021 | Actualizada ás 14:06
Traballadores propios e de empresas auxiliares da central térmica de Endesa nas Pontes (A Coruña) demandaron ás portas da sede do Goberno galego en Santiago de Compostela que as "promesas" se convertan en "solucións" a falta de 13 días para que o 30 de xuño expire o acordo de mantemento do persoal.
Na mañá deste xoves, decenas de empregados de Endesa e das compañías auxiliares da central concentráronse ante o edificio administrativo de San Caetano para reclamar ao Goberno galego e tamén ao central que acheguen "solucións" para a continuidade dos postos de traballo que dependen da planta de Endesa.
Acompañados polo presidente da Deputación da Coruña e alcalde das Pontes, Valentín González Formoso, e outros cargos do Partido Socialista, os manifestantes corearon consignas como 'Teresa Ribera, ao ERE ti primeira', 'Non é transición, isto é destrución' ou 'Queremos traballar, non emigrar'.
O responsable de CCOO José Hurtado --que tomou a palabra en nome do tres sindicatos convocantes da protesta (Comisións, UGT e CIG)-- lembrou que o próximo 30 de xuño finaliza o acordo para o mantemento do persoal e que, a partir desa data, "Endesa vai empezar a despedir xente e a quedar co mínimo, tanto de auxiliares como de persoal propio".
Neste sentido, apuntou que a empresa encargada dos servizos de limpeza na central xa anunciou un ERE extintivo que reducirá a "menos da metade" o seu persoal. Ademais, os sindicatos cren que, a partir de agosto, a planta deixará de contar con traballadores das empresas auxiliares e reducirase ao 30% o persoal de empregados directos de Endesa.
"Falamos de transición xusta, pero isto non é transición xusta cando queda o emprego atrás", incidiu o sindicalista antes de pór o acento na ausencia "de resposta" despois da petición de información trasladada a Xunta e Estado hai dúas semanas.
"Fálase de proxectos, en liñas xerais, pero non temos ningún enriba da mesa", continuou, antes de lembrar que Endesa "alega que a Xunta non lle favorece" co desenvolvemento de proxectos eólicos e que, por ese motivo, "di que marcha" das Pontes, o que suporía "un problema para toda a comarca".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.