Por Europa Press / Redacción | SANTIAGO DE COMPOSTELA | 17/06/2021 | Actualizada ás 17:34
O Xulgado Contencioso Administrativo número 2 de Ourense anulou parcialmente os orzamentos do Concello correspondentes ao exercicio de 2020.
O fallo dá a razón ao recurso interposto pola CIG e anulou o capítulo 1 das contas, que se corresponde co gasto de persoal, debido "á falta de negociación coas organizacións sindicais".
O xuíz estimou que "por máis que se escoitaban as partes e a reunión se estendera por máis de dúas horas e media, non houbo negociación", e ademais subliña que si se introduciron "modificacións substanciais na relación de postos de traballo" vulnerando así o dereito de negociación.
Por todo iso condenou ao Concello de Ourense a convocar, nun prazo de 20 días, unha Mesa Xeral de Negociación e ordenou anular todos os actos de materia de persoal que se aplicaron a partir do 2020 sen negociación coa parte sindical.
A modificación da relación de postos de traballo xa fora manifestada polo interventor no informe previo á aprobación dos orzamentos, que advertiu de "variacións que poderían ser causa de nulidade" por incumprir a lei de Estatuto Básico de empregado público. No seu momento o goberno local seguiu o informe da Asesoría Xurídica, que foi favorable.
Agora, o Concello de Ourense estuda a posibilidade de interpor recurso de apelación ante a Sala do Contencioso Administrativo do Tribunal Superior de Xustiza de Galicia.
"REPOR A LEGALIDADE"
Desde a CIG aseveraron que o alcalde, Gonzalo Pérez Jácome, está obrigado a convocar a mesa de negociación para "repor a legalidade que el mesmo incumpriu" e aseguran que a resposta por parte da central sindical será "proporcional ao sentidiño" que imprima o rexedor.
Ademais, censuran que a Mesa Xeral de Negociación, que se celebrou o 27 de novembro de 2019, constaba de 8 puntos "todos incluídos no Catálogo de materias negociables en base ao artigo 37 do EBEP" e o grupo de goberno "impediu o debate vulnerando o dereito á negociación colectiva".
"Estamos diante dun modo de gobernar que reflicte un menosprezo absoluto por valores como a pluralidade e o diálogo", acusan desde a CIG.
O BNG pide "responsabilidades" ao PP e a DO e advirte de que a sentenza lle deu a razón aos sindicatos, "pero tamén aos grupos que no seu día advertiron a ilegalidade dos orzamentos".
Para o portavoz municipal, Luís Seara, "PP e DO decidiron tirar para adiante e sacar uns orzamentos aínda con absoluta conciencia da ilegalidade" deixando agora "unha situación que empantana aínda máis unha caótica cidade".
Ademais, avanzou que solicitarán informes xurídicos para aclarar como afecta a sentenza á modificación de crédito de 62 millóns de euros proposta por Jácome e levada a unha cuestión de confianza.
Así mesmo, o portavoz nacionalista fixo fincapé en que o propio rexedor municipal, durante o último pleno, "agradeceu publicamente á concelleira Ana Morenza --no momento concelleira de Facenda-- polo traballo realizado e pola aprobación dun magnífico orzamento". "Á vista dos feitos, seguirá dándolle as grazas ou lle pedirá que deixe a súa acta de concelleira?", cuestionou Seara.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.