Por E.P. | SANTIAGO DE COMPOSTELA | 18/06/2021 | Actualizada ás 18:37
A Xunta de Galicia subliñou este venres a importancia do labor do Centro de Investigacións Mariñas (CIMA) na investigación de recursos marisqueiros como a coquina, e lembrou que, desde 2013, a Consellería do Mar destinou case 700.000 euros a estudos sobre a situación desta especie e á procura de solucións para aumentar a súa presenza nos bancos marisqueiros da comunidade.
Así o trasladou a conselleira Rosa Quintana, durante a súa intervención por videoconferencia na inauguración da xornada 'Comportamento ecosistémico e biolóxico da coquina en Galicia", organizada pola CIMA, e na que participan investigadores deste centro e doutras institucións, como o CSIC, o Instituto Español de Oceanografía ou o tres universidades galegas.
A conselleira apuntou a importancia dos estudos sobre a coquina, que é unha especie de "alto interese" para o marisqueo de Galicia, e que alcanza importantes cotizacións en lonxa, que roldan os 40 euros o quilo. De aí o interese por mellorar a súa produción e a importancia do labor da CIMA, que analiza diferentes parámetros ambientais e de poboación, co fin de promover a recuperación da especie.
Na xornada deste venres presentáronse os resultados dos estudos realizados desde 2013 e ata 2020. Así, os investigadores puideron manter individuos adultos de coquina e obter semente en condicións de laboratorio, o que permitiu desenvolver un protocolo de reprodución, cultivo larvario e preengorde, e replicalo de face a futuras accións de investigación.
A consellería do Mar aprobou unha partida de 174.000 euros para continuar a investigación ata 2024, coa realización de experiencias nas instalacións do minicriadero que a CIMA ten no Vicedo. O obxectivo deste traballo é a reprodución e cultivo larvario de moluscos bivalvos presentes nos bancos naturais da zona, como son as coquinas, e as ameixas babosa e fina.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.