Por Europa Press / Redacción | SANTIAGO DE COMPOSTELA | 21/06/2021 | Actualizada ás 15:08
Os preto de 500 traballadores de fundacións de investigación sanitaria contarán con melloras salariais e unha homoxeneizaicón de condicións laborais.
Este luns asinouse, en Santiago, o primeiro convenio colectivo específico para o persoal destas fundacións, nun acto no que o conselleiro de Sanidade, Julio García Comesaña, destacou que estas entidades están encargadas da xestión dos institutos de investigación biomédica de Galicia, a través dos cales o Sergas canaliza a innovación no campo sanitario.
De tal forma, haberá unha homoxeneización das categorías de persoal; melloras salariais con efectos retroactivos desde o 1 de xaneiro de 2021; regulación dos distintos permisos de conciliación e do teletraballo; medidas de igualdade de xénero, así como a implantación de plans de formación anuais.
Respecto diso, García Comesaña apunta aos retos de futuro como "o maior apoio ás 'spin-off', a integración da formación da investigación clínica ou o avance cara a unha carreira investigadora".
O conselleiro remarca que coa firma deste luns ponse fin a un longo proceso que supuña negociar tres convenios colectivos de forma conxunta, de maneira que se converte nun só acordo común para todo o sistema de investigación biomédica. Destaca que se produciron un total de 25 reunións da comisión de negociación e outras catro reunións do Consello Galego de Relacións Laborais.
O acordo foi asinado pola presidenta do Instituto de Investigación Sanitaria (IDIS), Eloína Núñez; o presidente do Instituto de Investigación Biomédica da Coruña, Luís Verde; do Instituto de Investigación sanitaria Galicia Sur, Javier Ponte, e representantes de varios comités de empresa.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.