Por Europa Press / Redacción | SANTIAGO DE COMPOSTELA | 21/06/2021 | Actualizada ás 18:06
A CIG reclama que o salario mínimo interprofesional se eleve ata os 1.150 euros ao mes para situalo no 60% do soldo medio actual, "tal e como establece a carta social europea".
A central nacionalista acusa ao Goberno central de "botar man de datos antigos" para limitar o seu incremento, de forma que cada traballador "deixará de ingresar 100 euros mensuais".
E é que, segundo indica esta organización, a semana pasada un comité de expertos "designado ad hoc" pola ministra de Traballo, no que participan representantes de UGT e CC.OO., da CEOE e Cepyme e dos ministerios de Facenda e Economía, "propuxo que o salario mínimo interprofesional tiña que situarse nun tramo entre os 1.011 e 1.049 euros ao mes para o próximo ano 2023".
Pola súa banda, a CIG lembra que o 8 de xuño o estado español ratificou a carta social europea, que no seu artigo catro "recoñece o dereito dos traballadores a unha remuneración suficiente que lles proporcione a elas e ás súas familias un nivel de vida decoroso".
"E foi o comité de dereitos sociais de Europa o que estableceu ese salario decoroso situándoo en polo menos o 60% do salario medio", resalta. Neste contexto, critica que a comisión de expertos utilice como referencia para calcular o SMI os datos achegados pola enquisa de estrutura salarial de 2018.
O salario medio mensual do último trimestre de 2020 foi de 1.899,9 euros, polo que o 60% en 2021 debería ser de 1.139,94 euros, "uns 100 euros ao mes máis da prometida subida salarial que queren aplicar en 2023", confronta.
Ademais, a CIG agrega que "hai que engadir as diferentes subidas do IPC en 2021, 22 e 23 (...) que se perderían ao aplicar o cálculo do ano 2018". Ante isto, demanda a Traballo e ao Executivo español "que deixen de mentir e enganar á clase traballadora" e que aumenten o salario mínimo interprofesional ata os 1.150 euros mensuais.
Por último, tamén solicita a supresión do indicador de renda de efectos múltiples e a utilización do salario mínimo como única referencia de indicador público para os efectos de fixar a contía de calquera prestación social pública, ademais de empregalo para o cálculo das pensións mínimas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.