O PPdeG reclamará no Parlamento que a lei estatal antifraude "respecte" as herdanzas en vida galegas

O PP de Galicia defenderá no pleno do Parlamento galego desta semana unha iniciativa --que previsiblemente sairá adiante-- para que a lei antifraude que está en tramitación nas Cortes Xerais "respecte" as herdanzas en vida que ampara o Dereito Civil de Galicia.

Así o explicou en rolda de prensa este luns o portavoz parlamentario dos populares, Pedro Puy, despois de que o PSOE presentase a semana pasada no Senado unha autoenmenda ao texto para manter a exención fiscal ao IRPF durante o cinco anos posteriores á celebración do pacto sucesorio ou do falecemento do titular dos bens a transmitir.

Neste sentido, Puy recalcou que a modificación que expoñen os socialistas "dá a razón" ás súas denuncias sobre que este texto "vulnera" a lexislación propia e a "autonomía financeira de Galicia". Con todo, o PPdeG segue vendo "insuficiente" que se acoute a cinco anos esta exención.

Por isto mesmo, a iniciativa que o Grupo Popular defenderá esta semana na Cámara galega buscará que o Goberno de España "respecte" a capacidade normativa en materia tributaria que outorgan a Galicia a Constitución, o Estatuto de Autonomía e as leis.

"Estamos a favor da tramitación dunha lei antifraude que reforce os instrumentos da Axencia Tributaria e a Inspección do Ministerio de Facenda, pero tamén estamos en contra de que se considere defraudador a un galego que exerce os seus dereitos cumprindo a lei", insistiu Puy.

O portavoz do PPdeG no Parlamento galego, Pedro Puy. / Europa Press. / Europa Press