O 'falso ecoloxismo' xa está en Galicia: marcas que se "visten de verde" para aumentar vendas

Greewashing: práctica pola cal as empresas “tentan subir ao carro da sustentabilidade” e o ecoloxismo “esaxerando” o seu compromiso co medio ambiente ou presumindo de prácticas ‘verdes’ que, realmente, “non levan a cabo”. Esa viría sendo a definición dun dos principais vicios que un estudo vén de advertir no conxunto da economía galega, que está a gañar terreo nos últimos tempos.

Este greenwashing déixase ver en campañas publicitarias de marcas diversas que destacan o seu papel na conservación do medio ou o coidado da contorna cando, en certos casos, seguen a desenvolver prácticas contaminantes ou que danan ese mesmo entorno que din protexer. 

A presenza desta “ecoimpostura” é tal que, segundo un estudo da asesoría de mercadotecnica Aporta Comunicación, o último  cribado de sitios web realizado pola Comisión Europea en xaneiro de 2021 perseguindo a fraude ambiental revelou que “o 42%” das compañías europeas rastrexadas mostran mensaxes “esaxeradas, enganosas ou, directamente, falsas”.

Os datos non son moito mellores no caso galego. O informe de Aporta rebela que “gran parte do tecido produtivo galego adoece dunha falta de estratexia que aborde a transición ecolóxica”. De feito, engaden, tan só “unha terceira parte” das empresas de Galicia contan cunha política ambiental “definida”. 

Así é que, segundo o estudo, o 60% dos empresarios manifestan que os aspectos ambientais non inflúen nas súas vendas, dado que consideran nun 46% dos casos que o que aprecia o consumidor circunscríbese exclusivamente ao prezo e o 12,4% ve nos atributos eco unha moda ou tendencia do momento.

OS SECTORES CON MÁIS 'POSTUREO'

Isto contrasta co dato que reflicte que un 73% dos enquisados foron capaces de detectar algún caso de greenwashing no mercado galego. “O  greenwashing existe porque algunhas marcas queren vestirse de verde para aumentar vendas ou gañar reputación, apoiándose en frases publicitarias baleiras de contido, ausencia de datos contrastados ou imaxes evocadoras dunha responsabilidade co planeta”, sinalan os autores da enquisa. Os sectores produtivos nos que detectan máis casos de impostura ecolóxica son o agroalimentario e o téxtil, cun 26% e un 22%, respectivamente.

Por riba, só un 44% dos enquisados asegura distinguir entre o greenwashing e o auténtico márketing verde e responsable. A falta de comunicación interna e cos seus grupos de interese móstranse, xunto á ausencia de códigos de conduta e boas prácticas, como obstáculos para alcanzar unha responsabilidade ambiental efectiva por parte do tecido produtivo. 

Na consulta realizada por Achega tamén se recollen os selos que acreditan pautas ambientais que identifican as empresas galegas. O 52% aseguraron coñecer este tipo de certificacións, destacando o selo  FSC -que acredita a xestión forestal responsable- como o máis nomeado, aínda que existe unha gran confusión entre o que é un selo acreditativo, unha norma  ISO, unha marca e unha entidade  certificadora ou reguladora.