Reflotado o barco "Sempre Güeto" no porto exterior de Ferrol e que sufrira un accidente en Cedeira
O cerqueiro permanecía atracado alí desde primeira hora da noite do pasado sábado, día 19, tras unha operación completada con éxito por Salvamento Marítimo.
Por E.P. | SANTIAGO DE COMPOSTELA | 23/06/2021 | Actualizada ás 17:05
O buque cerqueiro 'Sempre Güeto', que sufriu un incidente o pasado xoves nas proximidades da Punta Candieria, en Cedeira, que se saldou con dous falecidos e outro oito tripulantes rescatados, foi reflotado na mañá deste mércores, 23 de xuño, nunha operación realizada no espigón de abrigo do porto exterior de Ferrol, na zona de Caneliñas.
O cerqueiro permanecía atracado alí desde primeira hora da noite do pasado sábado, día 19, tras unha operación completada con éxito por Salvamento Marítimo.
O operativo, contratado polo armador do barco, con base en Portosín, Porto do Son, executouno a empresa local Amarradores do Porto e Ría de Ferrol, para o que utilizou dous grandes guindastres, unha na popa e outra na proa, e o apoio dun camión guindastre, situados todos eles sobre a zona portuaria.
MERGULLADORES
Tamén foi necesario a utilización de mergulladores que foron os encargados de unir o buque sinistrada coas cadeas e cables utilizados para poder realizar a manobra, e unhas proteccións para evitar a colisión do barco, de 22 metros de eslora, coa zona de atracada.
A embarcación deberá de ser agora sometida a un estudo por parte dos profesionais da Comisión Permanente de Accidentes e Incidentes Marítimos, dependente do Ministerio de Transporte, Mobilidade e Axenda Urbana, para determinar as causas deste accidente que se cobrou dúas vidas.
