Por Galicia Confidencial | Compostela | 24/06/2021 | Actualizada ás 19:16
O presidente da Xunta, Alberto Núñez Feijóo, criticou este xoves que a pesar de que "a pandemia non entende de cores políticas, lamentablemente na repartición dos fondos europeos hainos".
Feijóo fixo ese reproche na conferencia de prensa posterior á reunión semanal do seu gabinete e denunciou os criterios aplicados na repartición de fondos por parte do Executivo central despois de que, ao seu xuízo, Galicia sae prexudicada das axudas post-covid.
"Ocorreu tanto no primeiro fondo covid como no segundo, e no fondo dos autónomos fomos os que menos diñeiro recibimos sendo a Comunidade que ten un 7,2 % dos autónomos de España", incidiu. En base a esta situación na que Galicia "sempre sae prexudicada na repartición" segundo o mandatario galego, asegurou que a Xunta estudará a repartición dos fondos Next Generation para facer unha avaliación "global, seria e documentada".
Feijóo lamentou que con este tipo de repartición por "cores políticas", o Goberno central "vulnera, rompe e creba o sistema de financiamento autonómico", salientou. "É a primeira vez en corenta anos que se están repartindo miles de millóns de euros rompendo o sistema de financiamento autonómico" para adxudicar os fondos "en función do que interesa ao Goberno na súa estabilidade parlamentaria".
Ante esta situación, advertiu de que "o Goberno galego non pode calar nin mirar para outro lado" polo que indicou que este asunto será "tratado no Parlamento galego con luz e taquígrafos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.