Un garda civil acusado de apropiarse dunha lancha defende que a mercou nun despezamento
Aínda que indica que fixo diferentes xestións para dar a embarcación de alta, non chegou a rexistrala xa que non tiña factura da adquisición porque o despezamento pechou e non podía "acreditar" que era súa
Por E.P. | SANTIAGO DE COMPOSTELA | 01/07/2021 | Actualizada ás 14:59
O garda civil acusado de apropiarse dunha lancha en Boiro, aproveitándose da súa condición de axente da autoridade --para o que fiscalía pide cinco anos e medio de prisión--, defendeu que el comprou a súa embarcación nun despezamento, pero que non ten "nada que ver" coa que figura neste caso.
Así o apuntou na primeira xornada deste xuízo celebrado na Sección Sexta da Audiencia Provincial da Coruña, con sede en Santiago, na que negou os feitos que se lle imputan. Está acusado de dous delitos, un de apropiación indebida e outro contra a administración de xustiza, por uns feitos que se remontan ao ano 2003, cando exercía no posto de Boiro.
O acusado afirmou que comprou un casco de fibra de 4,95 metros nun despezamento a finais de 2001, o cal reparou. Posteriormente, instaloulle un motor que lle regalou un amigo e púxolle unha varanda metálica. Púxolle o nome de 'Rabuda', segundo di, diferente da embarcación 'Pana' que se lle imputa haberse apropiado.
Aínda que indica que fixo diferentes xestións para dar a embarcación de alta, non chegou a rexistrala xa que non tiña factura da adquisición porque o despezamento pechou e non podía "acreditar" que era súa. Con todo, explica que en "aquel momento o que se facía" era comprar documentación a outra persoa cunha embarcación similar para regularizala, pero finalmente non o fixo.
Segundo o escrito de acusación, o garda civil convenceu á vítima para que lle entregase a embarcación porque, deste xeito, evitaría ser sancionado por unha infracción administrativa.
Con todo, segundo o Ministerio Público, o axente apropiouse da lancha que, tres anos despois, en 2006, foi localizada en Escarabote polo seu antigo dono, que interpuxo unha denuncia contra o agora acusado.
Por estes feitos, abríronselle dilixencias militares por unha "falta moi grave" que supuxeron "cortar" a súa carreira, explica o acusado. "Hoxe sería capitán", sostén, se non existise esa denuncia. Está na reserva desde novembro de 2017.
NEGA AMEAZAS
Posteriormente, segundo a acusación, ameazou ás vítimas, nun pub en decembro de 2006, por mor da denuncia: "Ti e o teu irmán ides acabar no cárcere".
Preguntado no xuízo por esta afirmación, o garda civil dixo que foi "ao revés", dado que foi un dos irmáns, "cunha bebedeira", o que lle dixo: "Ímoste meter no cárcere".
TESTEMUÑAS
Familiares do prexudicado sinalaron ao acusado como a persoa que lles informou de que se requisaba a embarcación ao non ter documentación.
O prexudicado explicou que tres anos despois de que lle incautasen a súa lancha recoñeceu que era a súa embarcación en Escarabote por "varios detalles" artesanais, pois era "moi peculiar". Entre outros, apuntou ao pestillo de madeira que se fixo na porta.
Entre as testemuñas, interveu un dos irmáns da persoa á que se quitou a lancha. Así, asegura que o sarxento da Garda Civil acusado falou no seu día de que todo era un "complot" doutros axentes contra el. Precisamente, outro dos irmáns definiu como "unha bobada" o ocorrido, pero explica que se presentou a denuncia debido a que: "Os seus compañeiros da Garda Civil animábannos a que seguísemos co tema".
Este xoves celebrouse a primeira sesión dun xuízo que proseguirá o venres, 2 de xullo, coas declaracións de axentes da Garda Civil antes das conclusións e de que o caso quede visto para sentenza.
