Este sábado abre o prazo para pedir as axudas da Xunta para a conciliación laboral e familiar
A contía a percibir polo beneficiario estará determinada pola porcentaxe da redución de xornada e a súa duración. Tamén influirán outras cuestións, como o número de fillos a cargo do solicitante.
Por Europa Press / Redacción | SANTIAGO DE COMPOSTELA | 02/07/2021 | Actualizada ás 15:12
Este sábado abre o prazo de solicitude para as axudas que concede a Xunta para facilitar a conciliación da vida laboral e profesional a persoas traballadoras e familias monoparentais.
O período para presentar a documentación estará aberto ata o próximo 2 de agosto, segundo informa a Xunta nun comunicdo no que lembra que a orde --publicada este venres no DOG-- está dotada cun orzamento de 575.248 euros, un 27,4% máis que o pasado ano.
A contía a percibir polo beneficiario estará determinada pola porcentaxe da redución de xornada e a súa duración. Tamén influirán outras cuestións, como o número de fillos a cargo do solicitante.
En todo caso, as axudas oscilarán entre os 1.700 e os 3.700 euros como máximo. Este último suposto sería para o período máximo subvencionable, é dicir, oito meses de redución de xornada.
A Xunta resalta que estas subvencións se dirixen, principalmente, a homes en familias non monoparentais, pero tamén a familias monoparentais integradas por unha única persoa.
En ambos os casos, as axudas pretenden apoiar ás persoas que optasen pola redución da xornada de traballo entre o 1 de xullo de 2020 e o 30 de xuño de 2021 para dedicarse ao coidado dunha filla ou fillo menor de 3 anos; ou menor de 12 anos preséntase discapacidade igual ou superior ao 33%.
Para poder acceder ás mesmas, a redución da xornada debe ser de, polo menos, o 12,5%. As axudas tamén están abertas a persoas que adoptaron un neno ou nena ou que prestan acollemento familiar permanente ou preadoptivo.
Nestes supostos, para ter dereito ao abono, non poden transcorrer máis de 3 anos desde a data da decisión administrativa ou xudicial pola cal se constitúe a adopción. En calquera caso, a filla ou fillo deberá ser menor de 12 anos.
