O Goberno aproba o proxecto de humanización da avenida das Pías en Ferrol
Supón a primeira parte dunha intervención demandada desde hai anos que o Executivo quere financiar co Mecanismo de Recuperación e Resiliencia.
Por E.P. | Ferrol | 05/07/2021 | Actualizada ás 13:33
O Ministerio de Transportes, Mobilidade e Axenda Urbana (Mitma) deu luz verde á primeira parte do proxecto de remodelación e humanización da avenida das Pías, unha das principais vías de entrada á cidade de Ferrol. O secretario xeral de Infraestruturas, Sergio Vázquez, anunciáraoo hai un mes e este luns o departamento que dirixe José Luís Ábalos confirmou a aprobación dunha intervención que, nesta primeira fase, centrarase entre os puntos quilométricos 0,600 e 1,100, nos barrios de O Bertón e Caranza.
O Mitma sinala que a conversión da avenida das Pías nunha vía urbana suporá "unha notable mellora para a seguridade viaria e a humanización da súa contorna". As obras licítanse por 5,68 millóns e o Goberno quere financialas a través do Mecanismo de Recuperación e Resiliencia articulado pola Unión Europea a consecuencia da pandemia. Paralelamente, o Ministerio de Transportes, Mobilidade e Axenda Urbana segue traballando na redacción da segunda parte desta actuación, que afectará aos primeiros 600 metros da vía.
PERMEABILIDADE ENTRE BARRIOS
O obxectivo das obras é eliminar a actual barreira que existe entre os barrios de O Bertón e Caranza. A avenida ten dobre calzada, con limitación de accesos e ligazóns a distinto nivel, características, apunta o Mitma, que "non dan opción a unha integración na malla urbana e constitúe un impedimento físico para a permeabilidade de vehículos e peóns entre ambas as marxes e os barrios situados nelas".
Así, suprimirase a ligazón de Caranza e substituirase por unha glorieta que conectará a avenida principal de O Bertón coa das Pías, así como coa rúa Marqués Santa Cruz. Ademais, a conversión da avenida das Pías nunha vía urbana supón que, a pesar de manter os dous carrís por sentido, o dereito funcionará como vía de servizo para dar acceso a interseccións, aparcadoiros e paradas.
