A vacinación masiva do domingo na Cidade da Cultura en Santiago tivo un 78% de participación
As autoridades sanitarias reiteran o chamamento aos cidadáns para acudir a vacinarse.
Por Europa Press / Redacción | SANTIAGO DE COMPOSTELA | 05/07/2021 | Actualizada ás 17:32
A vacinación masiva contra a Covid-19 na Cidade da Cultura en Santiago de Compostela deste pasado domingo, 4 de xullo, tivo un 78 por cento de participación.
Así o informou a área Sanitaria de Santiago e Barbanza, que detallou que ata este domingo administrou 492.187 vacinas e 221.035 persoas teñen a pauta completa.
A campaña de vacinación continúa na área compostelá con máis de 6.200 persoas citadas este martes, delas 5.000 na Cidade da Cultura, do grupo etario de 30 a 39 anos, ás que se prevé administrar a primeira dose de Moderna.
A elas súmanse máis de 400 no Hospital Clínico de Santiago para recibir a segunda dose de Pfizer e unhas 800 de 30 a 39 anos no Hospital do Barbanza onde se lles administrará a primeira de Pfizer.
As autoridades sanitarias reiteran o chamamento aos cidadáns para acudir a vacinarse contra a Covid-19 no marco desta pandemia.
