Póñenlle nome a decoración da Ribeira Sacra e do camiño de Santiago: "esgrafiados de estilo galego"
Apatrigal di que é unha técnica que se usa para o lucido e revestimento de muros e fachadas que "ata agora non estaba catalogada na arquitectura de Galicia".
Por Galicia Confidencial | SANTIAGO DE COMPOSTELA | 08/07/2021 | Actualizada ás 21:40
Tras anos de investigación, Mar López Sotelo define o termo “Esgrafiados Estilo Gallego” para referirse aos elementos de decoración que se localizan na Ribeira Sacra e no camiño de Santiago. A investigadora constatou a existencia dun estilo propio característico do patrimonio rural galego, que evolucionou da arte inciso parietal cunha clara influencia románica.
"O Esgrafiado é unha técnica ornamental que se usa na decoración para o lucido e revestimento de muros e fachadas, tanto no exterior como no interior dos edificios. Trátase dunha técnica moi antiga que non estaba catalogada ata agora na arquitectura galega", apunta nun comunicado a Asociación para a Defesna do Patrimonio Cultural Galego (Apatrigal).
As conclusións desta investigación comparativa reflíctense na obra: Esgrafiados en la ribeira Sacra y el camino de Santiago. Obras de arte y simbolismo en las paredes, será presentado nun acto que se celebrará o vindeiro luns día 12 de xullo ás 20:00 horas no instituto Campus Stellae en Santiago de Compostela e as mostras poderanse ver na exposición fotográfica que acollerá o instituto na súa sede.
Son anfitrións e organizadores do evento o Colexio Oficial de Arquitectos de Galicia (COAG), o instituto Campus Stellae e a Asociación para a defensa do Patrimonio Cultural Galego (apatrigal), que consistirá na presentación do libro e a inauguración da exposición de fotografías de esgrafiados de estilo galego.
