Por X.M. Fernández | Verín | 10/07/2021 | Actualizada ás 11:00
Segundo explicou o alcalde de Verín, Gerardo Seoane Fidalgo, os traballos de mellora no abastecemento de auga potable realízanse coa finalidade de asegurar para toda a poboación o acceso a este servizo básico en todas as parroquias. En palabras do propio rexedor: "sexa ou non a súa rede de abastecemento de titularidade municipal, adiantámonos á posible seca que se prevé poida producirse ao longo da época estival".
“Nalgunhas destas parroquias”, lembrou Seoane, “autoabastecíanse a través de pozos privados ou directamente do propio río, xerándose con frecuencia dificultades para garantir a auga potable en cantidade e calidade suficiente”.
Así pois, atendendo ás súas necesidades específicas, realizáronse diferentes accións nos núcleos rurais que así o necesitaban:
Mourazos: construción de dous novos pozos subterráneos de captación de auga potable con abastecemento eléctrico e sistema de bombeo.
Tamaguelos: construción dun novo pozo subterráneo de captación de auga potable con abastecemento eléctrico e sistema de bombeo.
Feces de Cima: construción dun novo deposito de auga, así como do seu conduto desde a captación.
A Rasela: por mor de problemas de subministración co seu antigo depósito, realizouse a conexión á rede de abastecemento do núcleo urbano de Verín (xestionada pola empresa Espiña e Delfín).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.