Condenado a dous anos de cárcere un empresario que falsificou a sinatura dun empregado para simular que cobrara

A Audiencia Provincial de Ourense condenou a dous anos de cárcere, como autor dun delito de estafa procesual, a un empresario que falsificou a sinatura dun dos seus traballadores co obxectivo de simular que cobrara as súas nóminas, liquidacións e pluses de transporte.

A presentación deses documentos provocou que o xulgado ante o que o empregado reclamou o seu pago ditase unha resolución que prexudicou os seus intereses.

Ademais, a sección segunda da Audiencia impuxo ao empresario o pago dunha multa de 1.800 euros. O investigado tamén deberá pagarlle ao empregado o diñeiro que lle debe.

"A declaración do denunciante, persistente no tempo, pon de manifesto que as firmas controvertidas non foron subscritas por el, sostendo que a primeira vez que viu os documentos en cuestión foi no acto de xuízo", destacan os maxistrados.