Alumnos de grupos do mesmo curso con baixa transmisión poderán interactuar no recreo para o curso 2021-22
Así aparece no documento dado a coñecer este venres ao Consello Escolar de Galicia nun encontro no que participaron o titular de Educación, así como o conselleiro de Sanidade, Julio García Comesaña.
Por E.P. | Santiago de Compostela | 09/07/2021 | Actualizada ás 18:44
O Protocolo de adaptación aos centros de educación non universitaria de Galicia para o próximo curso 2021-2022 permite que os alumnos compartan obxectos tanto na aula como no recreo e, ademais, contempla que os grupos de convivencia estable poidan interaccionar con outros do mesmo curso se a incidencia é baixa.
"Os grupos burbulla van poder interactuar ao aire libre nos recreos e van poder xogar entre eles. Algo tan sinxelo como xogar cunha pelota ao baloncesto ou ao fútbol nun recreo, que antes non se podía, agora vaise a poder facer", destacou este venres o conselleiro de Cultura, Educación e Universidade, Román Rodríguez.
O documento foi dado a coñecer este venres ao Consello Escolar de Galicia nun encontro no que participaron o titular de Educación, así como o conselleiro de Sanidade, Julio García Comesaña. O texto, ratificado polo Comité Clínico o pasado martes, adáptase ao establecido na Declaración de Accións Coordinadas dos ministerios de Sanidade e Educación para o conxunto do Estado, conforme sinalou a Xunta.
O protocolo avanza en novas medidas de transición a aplicar nas aulas galegas co obxectivo de garantir a seguridade sanitaria así como o proceso académico. Como no curso pasado, conforme precisou Educación, establece que se manterá a actividade lectiva presencial en todas as etapas educativas, polo que os centros permanecerán abertos durante todo o curso, do mesmo xeito que o funcionamento de todos os servizos complementarios e o apoio lectivo aos alumnos que o necesiten.
En canto á organización nas aulas, nas etapas de Infantil, Primaria e Educación Especial, os nenos seguirán organizados en grupos de convivencia estable, tanto na aula como fóra dela (é dicir, en recreos e comedor), polo que non se aplicarán criterios de distancia nestes casos. Ademais, de alcanzarse unha situación de baixa transmisión (fase de nova normalidade), estes grupos poderán interaccionar con outros do mesmo curso.
Para o resto das etapas, a distancia xeral na aula será de 1,2 metros. E para todas as etapas é obrigatorio o uso da máscara todo o tempo --dentro e fose da aula-- a partir do seis anos, e recomendable para os menores de seis.
COMPARTIR MATERIAIS
A partir de setembro, os nenos poderán compartir obxectos tanto no interior como no exterior, sempre aplicando as medidas de hixiene decretadas. Así pois, os alumnos dun mesmo grupo burbulla poderán xogar con elementos de uso compartido (balóns, cordas e xoguetes) no recreo ou usar materiais como tobogáns.
As bibliotecas escolares aplicarán o aforamento xeral das bibliotecas públicas (que neste momento é do 75%) e recuperan o procedemento habitual de préstamo de libros e material sen que teñan que ser sometidos a corentenas.
No que respecta ás medidas básicas de prevención, mantense todas as pautas hixiénicas (lavado de mans, emprego de hidrogel ou reforzo da limpeza de espazos e mobiliario entre outros), así como os protocolos de ventilación vixentes, facendo especial fincapé na ventilación frecuente ao comezo e ao termo da xornada e nos cambios de aula, así como a ventilación cruzada para favorecer a circulación.
Ademais, os centros continuarán cos seus plans de continxencia e cos equipos covid como canle de ligazón coas autoridades sanitarias a través da Central de Seguimento de Contactos (CSC).
O CONSELLEIRO ASEGURA A DOTACIÓN DE RECURSOS
O conselleiro de Educación, Román Rodríguez, sinalou que este é un protocolo de transición elaborado neste momento concreto e atendendo a unha situación concreta, polo que se trata dun documento "vivo" que estará sometido a unha "continua revisión" en función da evolución epidemiolóxica e das decisións que adopten as autoridades sanitarias.
"Será en todo momento a situación epidemiolóxica a que nos marque o camiño a seguir", recalcou o conselleiro, que defendeu que a comunidade educativa "debe dispor dunhas regras claras e concisas" para a organización dos cursos fronte a "erros do pasado que non se poden volver cometer".
Román Rodríguez destaca que a "absoluta prioridade" do Goberno galego segue sendo garantir a seguridade nas aulas e a actividade académica e, para iso, asegura que se van a manter os apoios de carácter extraordinario habilitados ata o momento como as partidas de Reserva de Garantía Educativa para que os centros sigan facendo fronte aos gastos derivados da aplicación do protocolo, os reforzos de limpeza e de comedor escolar, os apoios ás anpas, ou a dotación de máscaras hixiénicas entre o profesorado e o alumnado que máis o necesite. Tamén comprometeu "todos os recursos humanos que fagan falta" para seguir asegurando a calidade e a equidade do sistema educativo.
Pola súa banda, o titular de Sanidade agradeceu o esforzo da comunidade educativa no cumprimento das normas anticovid. Ademais, destacou que agora toca seguir avanzando e dando pasos, pero permanecendo "sempre vixiantes", e esperando poder ter cando antes aos escolares vacinados, "para o que fai falta que cheguen as vacinas".
MESA SECTORIAL
Respecto diso, nun comunicado remitido aos medios, a CIG-Ensino informou de que este documento será abordado, tal e como pediu a central nacionalista, nunha mesa sectorial que terá lugar o vindeiro martes, día 13 de xullo.
