Os comerciantes galegos piden ao Goberno que estenda os ERTE ata finais de ano ou principios de 2022
"A mediados do ano que vén poderiamos estar máis boiantes", agardan.
Por E.P. | SANTIAGO DE COMPOSTELA | 12/07/2021 | Actualizada ás 13:08
O presidente da Federación Galega de Comercio, José María Seijas, pediu ao Goberno central que estenda os ERTE ata finais deste ano ou principios do próximo 2022.
Seijas acreditou que no sector hai "moita xente que está en ERTE, e no momento que haxa que recuperar todos os persoais e dadas as circunstancias de como haberá que facelo, haberá moitos comerciantes que non poidan asumir todo o persoal que tiñan dado que as vendas están moi por baixo do que é a normalidade".
Á vista diso, xa advirte: "Ou as administracións dan un paso adiante para poder axudar a recuperar este persoal ou senón haberá moitos comercios que terán que pechar".
Seijas fixa o escenario da recuperación "o próximo ano, en que esperamos que as cousas empecen a normalizarse e tamén hai que confiar en que non haxa estes picos na pandemia porque isto tamén retrae" ao consumidor". "A mediados do ano que vén poderiamos estar máis boiantes", agarda.
José María Seijas celebrou, seguidamente, que o período de rebaixas iniciado o pasado 1 de xullo "vaise notando un pouco": "Seguimos nesa tónica de recuperación". "Temos que destacar que o tempo nos está influíndo favorablemente, vaise movendo un pouco (o comercio) e en canto ás rebaixas vaise a cumprir o que tiñamos previsto, que é un incremento moi lixeiro con respecto a 2020. Imos manténdonos, pero sen grandes cousas que destacar", concluíu o presidente da Federación Galega de Comercio.
