A oposición esixe a Feijóo que manteña aos docentes contratados de reforzo pola covid-19
O PPdeG asegura que o reforzo respondeu a "unha situación extraordinaria" e di que se "manterá" se esta se repite.
Por Europa Press / Redacción | Santiago de Compostela | 12/07/2021 | Actualizada ás 13:59
A portavoz nacional do BNG, Ana Pontón, e o secretario xeral do PSdeG, Gonzalo Caballero, esixiron ao presidente da Xunta, Alberto Núñez Feijóo, que manteña para o próximo curso os docentes contratos de reforzo durante a pandemia.
En declaracións aos medios este luns no Parlamento de Galicia, a líder do Bloque asegurou que a covid demostrou "que se necesita máis profesorado" tras "anos de recortes" de docentes cos gobernos do Partido Popular. "Equivócase Feijóo e nós pedímoslle unha rectificación non só para que se manteña todo o persoal contratado durante a covid, senón para que se reforce o sistema", sostivo.
Pontón considerou que hai unha oportunidade para facer unha mellor educación, "que é o mellor investimento que pode facer un país" e sostivo que Feijóo "volve mostrar unha miopía importante" e "a súa incapacidade para defender uns servizos públicos de calidade".
Pola súa banda, noutra rolda de prensa celebrada no Pazo do Hórreo, o xefe de filas dos socialistas galegos, Gonzalo Caballero, instou ao máximo mandatario autonómico a "non iniciar o curso que vén despedindo por centos de profesores". "Que manteña os contratos a todos os profesores de reforzo que existiron no curso 2020-2021 e que non queira facer na educación o mesmo que fai na sanidade", afirmou.
Tras censurar tamén que na atención primaria haxa listas de espera e que a asistencia sexa "telefónica e non presencial", criticou que o Partido Popular non queira saír da crise reforzando os servizos públicos e todo o que implica benestar e cohesión social.
"Para ter unha educación de calidade é necesario manter a todos os profesores contratados, non podemos seguir á cola das listas de España en calidade de servizos públicos e sociais", incidiu Gonzalo Caballero, que se mostrou convencido de que para saír da crise se precisa dun "fortalecemento claro" da sanidade, a educación e os servizos sociais.
RESPOSTA DO PPDEG
Respecto diso, o portavoz parlamentario do PPdeG, Pedro Puy, destacou que "o ano pasado foi un ano extraordinario" no que "se puxeron todos os medios necesarios para manter a normalidade do proceso educativo". "Unha cuestión que ten máis importancia da que parece sobre todo se observamos outros países, sen ir máis lonxe en Europa, nos que houbo períodos de interrupción moi larga da docencia", dixo para considerar que iso, sobre todo nos niveis de primaria e secundaria, "vai supor un problema a medio e longo prazo".
Fronte a iso, destacou que a Xunta de Galicia puxo "todos os medios" para "superar unha situación extraordinaria". "O que imos é a seguir pondo todos os medios necesarios en función de como evolucione a situación sanitaria e as esixencias da propia pandemia", indicou.
