Ana Miranda reclama que as axudas da nova PAC contemplen a "realidade da agricultura galega"
A portavoz do BNG en Europa alerta de que "falta capacidade para negociar".
Por Europa Press / Redacción | SANTIAGO DE COMPOSTELA | 12/07/2021 | Actualizada ás 17:49
A portavoz do BNG en Europa, Ana Miranda, reivindicou, este luns en Castroverde, máis axudas da nova Política Agraria Común (PAC) para Galicia.
Así, Miranda denunciou que é un "problema persistente do agro galego" esa falta de axudas, a pesar de que Galicia "é o primeiro produtor do Estado" e "é das rexións de Europa con maior produción cárnica e láctea".
A nacionalista alertou de que "falta capacidade para negociar". Remarca que este mércores hai unha reunión sectorial entre comunidades autónomas e o Estado en Madrid. Para ese encontro, o Bloque pide que "o novo plan estratéxico da PAC contemple a realidade social, territorial e ambiental da agricultura galega, que está baseada en pequenas explotacións". "E que Galicia sexa ben tratada e que non volva estar por baixo da media de axudas que nos ten que corresponder", agrega.
Miranda non dubida que a nova PAC é "mala para Galicia". "Está claro que as axudas son necesarias, pero os interlocutores que negocian por nós deixan tirado ao sector", reprocha. Lamenta que non se ten en conta "a realidade do tipo de explotacións medias que aquí son explotacións pequenas, sobre todo na provincia de Lugo e da que vive moita xente".
A portavoz nacionalista en Bruxelas apelou a que "esa figura do agricultor activo ou xenuíno ao que se lle dá axudas non se corresponde coa realidade galega, que quere a terra e tamén traballala". "E é por iso que queremos que as axudas vaian para quen traballa a terra", deixou claro.
Ana Miranda e a deputada do BNG no parlamento de Galicia, Carmen Aira, visitaron a explotación de Vilcote en Castroverde onde falaron da consecuencia da PAC para Galicia.
