Por Europa Press / Redacción | SANTIAGO DE COMPOSTELA | 13/07/2021 | Actualizada ás 14:25
A Feira das Industrias Culturais de Galicia, Culturgal, celebrará a súa edición número 14 en Pontevedra do 26 a 28 de novembro baixo a lema 'A cultura que toca'.
Este martes presentouse o evento na Ponte do Burgo, da cidade do Lérez, polo que se abre así o prazo de reserva de espazo feiral para empresas, entidades e artistas. Ao mesmo tempo arrinca a convocatoria para participar na programación, con prazo ata o 15 de setembro.
Nesta presentación participaron o presidente e o director de Culturgal, Víctor López e Xosé Aldea, respectivamente; acompañados da deputada provincial Vitoria Alonso; o director da Agadic, Jacobo Sutil e a concelleira de Cultura de Pontevedra, Carme Fouces. Aínda que non estivo representado na rolda de prensa, o Ministerio de Cultura e Deporte tamén é un dos patrocinadores da Feira.
Víctor López xustificou este acto na rúa en "esa necesidade" que todos teñen "de recuperarnos como ser sociais, de recuperar o goce do espazo público, de recuperar o goce da cultura". De aí tamén que a lema deste ano teña "un amplo significado", comentou, entre elas que esta edición do Culturgal sexa a do reencontro, "a da recuperación, do contacto directo coa cultura".
Polo seu lado, o director da Feira, Xosé Aldea, convidou ao sector cultural a participar na Feira confeccionando un programa que é "un proxecto colectivo". A dixitalización da Culturgal toma impulso tras unha pasada edición en streaming que serviu de aprendizaxe para a organización que, en 2021, porá en marcha a Culturgal TV, unha canle que a maneira de magazine funcionará como "unha tele cultural de fin de semana". O venres 26 de novembro será unha xornada orientada aos profesionais do sector e os días 27 e 28 abrirase ao público.
Vitoria Alonso, deputada de Cultura e Igualdade na Deputación de Pontevedra, destacou a presenza que terá a institución provincial na Feira con caseta propia mostrando a cultura feita na provincia e "traballando con entusiasmo con todos os concellos para mostrar o seu labor cultural", sinalou.
ALMA
Por parte da Axencia Galega das Industrias Culturais (Agadic), Jacobo Sutil confirmou a presenza da Xunta de Galicia con caseta propia e valorou que "é unha moi boa noticia recuperar a presencialidade e o contacto directo do público coa cultura, imprescindible para reactivar o sector entre todos", apuntou.
Finalmente a concelleira de Cultura, Carme Fouces, incidiu en que Pontevedra "non só porá o espazo físico, o Pazo da Cultura, senón a alma nesta Culturgal da recuperación".
Culturgal foi un do tres eventos mellores valorados do Estado dentro da convocatoria ministerial 2020 de axudas para a acción e a promoción cultural. Con este motivo, o 11 de novembro a organización está convidada a un acto na Fundación Telefónica de Madrid promovido polo Ministerio de Cultura no que se presentará o proxecto Culturgal ao longo das súas 14 edicións.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.