Sanidade defende que o proceso de expediente ao xinecólogo de Verín se fixo "con todas as garantías"

"Aquí, o que hai é un axuste de contas, unha represalia contra unha persoa que o único que fixo foi defender o hospital público", mantén o PSdeG.

Por Europa Press / Redacción | Santiago de Compostela | 14/07/2021 | Actualizada ás 19:06

Comparte esta noticia

O conselleiro de Sanidade, Julio García Comesaña, defendeu que o proceso sobre o expediente aberto ao xinecólogo do Hospital de Verín se fixo "con todas as garantías" para os dous implicados, "o facultativo que o denuncia e o profesional denunciado".

Varias persoas maniféstanse diante do Hospital de Verín para apoiar ao xefe de Xinecoloxía, Javier Castrillo
Varias persoas maniféstanse diante do Hospital de Verín para apoiar ao xefe de Xinecoloxía, Javier Castrillo | Fonte: Rosa Veiga - Europa Press.

"Non podemos saltarnos os dereitos dun, pero tampouco os da muller que interpuxo a denuncia", manifestou este mércores no pleno do Parlamento de Galicia, onde deu resposta a unha pregunta oral a través da que o deputado do PSdeG Juan Carlos Francisco Rivera lle pediu que retire este expediente.

Na súa intervención, o conselleiro mostrouse "sorprendido" por ter que acudir á Cámara galega a responder unha pregunta que "dubida da independencia e o traballo feito da profesional que foi instrutora deste expediente".

Tras criticar tamén que o secretario xeral do PSdeG, Gonzalo Caballero, dese unha rolda de prensa na porta do Hospital de Verín "dubidando dos procesos regulados para a defensa dos dereitos dos traballadores do Sergas", acusou os socialistas de ter "pouca consideración" coa facultativa que "presentou a denuncia".

"Vostedes queren que arquivemos o expediente e metámolo nun caixón. E onde quedan os dereitos desa profesional que denunciou uns feitos polos que sentiu maltratada por parte dese facultativo?", preguntouse Comesaña, que dixo que o PSOE "só vea polos intereses dun profesional en concreto".

Pola súa banda, o deputado do PSdeG asegurou o expediente con dous días de suspensión de soldo xustifícase en base a unha "desconsideración cun compañeiro" que "nin está probada nin obedece aos feitos". "Aquí, o que hai é un axuste de contas, unha represalia contra unha persoa que o único que fixo foi defender o hospital público", incidiu.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta