Pontón (BNG) pide ao Sergas que compre en empresas locais as máscaras e apela á prudencia aos mozos
"A covid demostrou a importancia de ter empresas que produzan no país para non ter que depender do que deciden fóra", di.
Por Europa Press / Redacción | SANTIAGO DE COMPOSTELA | 15/07/2021 | Actualizada ás 12:29
A portavoz nacional do BNG, Ana Pontón, dirixiuse este xoves ao Sergas para reclamar que "aposte por contratar con empresas locais as máscaras e outros elementos de protección" contra a pandemia.
"A covid demostrou a importancia de ter empresas que produzan no país para non ter que depender do que deciden fóra, en particular no mercado asiático", sinalou a líder nacionalista, que este xoves visitou a empresa Anovada, que fabrica este tipo de elementos, no polígono do Tambre en Santiago.
Pontón reclama que desde as administracións, e especialmente a autonómica, "se apoie ás empresas galegas na contratación, primando a calidade sobre o prezo, a creación de emprego e a redución da pegada ambiental que supón traer os produtos desde miles de quilómetros" de distancia.
O BNG, ademais, quérese sumar este xoves á homenaxe ás vítimas da covid-19 e ao persoal sanitario, a quen se lles dedica un acto de estado nesta xornada. Con todo, dixo que isto non é suficiente e é preciso "reforzar a sanidade pública, cuxos profesionais están exhaustos".
A dirixente nacionalista, que recoñeceu o "esforzo" de toda a sociedade galega e dos mozos, fixo un novo chamamento a este colectivo para que "manteña a prudencia" mentres non chegue a vacina.
