O dono do bar franquista de Arteixo nega ter colgado carteis de "rojos al paredón"

Un verán máis, renace a polémica do bar con decoración franquista de Arteixo. 'O Ferrador', un local situado na estrada entre as vilas de Caión e Barrañán, saltou o pasado mes de agosto aos xornais nacionais despois de que Galicia Confidencial se fixera eco da resposta social ante o seu peculiar atrezo: a fachada está salpicada con bandeiras que mostran a Águila de San Xoan e, nalgunhas delas, proclamas propias da ditadura do século pasado.

José Manuel, o dono do local, xa apuntou pola etapa estival pasada que non retiraría a decoración por "estar no seu dereito", ao tratarse dunha propiedade privada. Agora, a polémica vén de subir un novo chanzo ao aparecer na fachada do bar carteis con chamamentos á "resurrección" de Franco --"España te necesita", engade-- ou con oracións tan contundentes como a seguinte: "Rojos no hay perdón, al paredón".

Logo de que diversos medios se fixeran eco do acontecido, o propietario do local vén de saír na súa defensa ao asegurar que os carteis foron colocados por terceiros e que el "non ten nada que ver". "Isto viñeron poñelo aquí para sacar a foto e xerar polémica", asegura o dono, que di non ter "nada en contra dos rojos". "Eu vou cun rojo a misa", asegura, antes de apuntar que "de dereitas son, pero non son un asasino".

José Manuel sostén, neste aspecto, que os carteis foron colocados para incriminalo e manchar a imaxe do local. "Vese que hai xente á que lle estorbo", espeta. O propietario, que xa retirou a cartalería, asegura que os papeis foron colocados por unha asociación de corte galeguista, da cal --apunta-- apareceron adhesivos na contorna do bar. "Non sei se é unha organización terrorista ou que é", engade.

A ESTATUA DO CHÉ

Con respecto ás bandeiras franquistas, das que si recoñece a autoría, aseguran que son "legais" e "a bandeira de España de toda a vida". O propietario deste polémico local situado no Concello de Arteixo non agocha a súa veneración ao ditador Franco, do que di que "hai que bicarlle os pés", e critica que o emprego da iconografía de corte comunista non sexa vista con igual rexeitamento. "Logo temos a cara do Ché na rotonda de Santa Cruz e non podemos dicir nada", apunta en relación a unha obra do alcalde de Oleiros, Ángel García Seoane, que no seu momento tamén espertou non poucas polémicas.