Por Europa Press / Redacción | SANTIAGO DE COMPOSTELA | 15/07/2021 | Actualizada ás 16:02
O Parlamento aprobou por unanimidade dos grupos (PP, BNG e PSOE) pedir á Xunta que continúe incorporando "máis vantaxes" ao Carné Xove. En concreto, solicítao para seguir promovendo entre as novas xeracións descontos no ámbito cultural, no aloxamento, nos transportes, no comercio e no ensino.
No debate, a popular Noelia Pérez reivindicou as políticas da Xunta nesta materia, mentres a socialista Noelia Otero e o nacionalista Paulo Ríos valoraban como "boa noticia" que se avance no Carné Xove pero lamentaban o "autobombo" coa iniciativa.
Por outra banda, foron rexeitadas senllas propostas da oposición na mesma comisión, a de sanidade, política social e emprego, a primeira delas do PSdeG sobre as entidades de iniciativa social que prestan servizos sociais, para abordar a problemática derivada dos sobrecustos pola crise da covid.
Respecto diso, Noelia Pérez, polo grupo maioritario, respondeu que "desde o minuto 1 tiveron apoio, dous meses despois tiveron un plan de recuperación e houbo interlocución continua" con estas entidades desde o Goberno galego.
O outro texto, do Bloque, pretendía ampliar a rede de puntos de encontro familiar e actualizar a súa normativa, pero Pérez defendeu o "traballo ben feito" por parte do Executivo autonómico e rexeitou a proposición porque "non pide nada novo".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.