Bugallo avoga por "pasos adiante" no Peleteiro cunha proposta que "pode aprobarse" en outubro
Descarta "afectación" ás liñas de autobuses pola folga convocada en Tussa.
Por E.P. | SANTIAGO DE COMPOSTELA | 16/07/2021 | Actualizada ás 13:43
O alcalde de Santiago, Xosé Sánchez Bugallo, aposta por "dar pasos adiante" no proxecto para os terreos que ocupaba o colexio Peleteiro, para o que deu a coñecer unha proposta que "conta con todos os informes favorables" e, segundo destacou, "podería quedar aprobada" en outubro ou novembro deste ano.
En calquera caso, o rexedor apuntou á existencia de catro alternativas, a situación actual, a exposta e avalada polo seu goberno, unha terceira en estudo que introduce algunha modificación e a cuarta, presentada por Compostela Aberta e que tamén será examinada.
Bugallo asegurou estar "a buscar as mellores solucións non só pensando en hoxe ou o ano que vén, senón pensando nunha perspectiva de 50-75 anos". A continuación trasladou as principais liñas dun informe que analiza as consecuencias das diferentes decisións que se poden adoptar para estes terreos, sobre todo no relativo a como deixaría pasar o sol as distintas opcións.
O seu obxectivo é que esta reciba "luz verde" o día 29 e logo que se someta a información pública, co horizonte de aprobación en "outubro-novembro", segundo os seus cálculos. "Podería quedar aprobada e a partir de aí a corporación municipal tería que tomar unha decisión entre as diferentes opcións viables", incidiu.
Neste sentido, esperou que o PP, que "non se definiu, defina unha posición realista e razoable", e engadiu que "se houbese unha maioría absoluta sobre unha posición diferente", o seu goberno aceptará esa posición.
TUSSA, RESTOLLAL, COVID
Por outra banda, sobre a folga convocada en Tussa, a empresa de transporte urbano da cidade, destacou que sente un "gran respecto" por ese dereito. O primeiro edil mostrou a súa sorpresa por que o conflito nesta compañía se centre nunha subida do salario por encima do IPC cando "perde 12.000 euros por empregado e ano".
En canto ao proxecto para O Restollal, ratificou que a intención do goberno municipal é que esa sexa "unha das actuacións prioritarias" que se beneficien con fondos europeos, tendo en conta que está "fóra do alcance dos recursos municipais".
Por último, fixo un chamamento aos mozos para que acudan aos cribados para detectar contaxios de covid, ou, en caso de non poder asistir, que vaian á farmacia para realizarse a proba.
