A Xunta pon coto ás reunións privadas: seis persoas no interior e dez no exterior

A Xunta de Galicia limitará desde este sábado as reunións a seis persoas no interior e a 10 no exterior, ou dúas unidades de conviventes en ambos os casos, debido á situación epidemiolóxica pola Covid-19.

Así o anunciou este mércores o presidente da Xunta, Alberto Núñez Feijóo, na rolda de prensa para informar as medidas adoptadas polo comité clínico, na que destacou, así mesmo, que os non conviventes non poderán reunirse entre a 1,00 e as 6,00 horas nos municipios con nivel máximo e alto de restricións.

Pola súa banda, nos concellos en nivel medio e baixo, onde segue aberto o lecer nocturno, as reunións de non conviventes estarán prohibidas entre as 3,00 e as 6,00 horas. O mandatario autonómico explicou, así mesmo, que a Xunta pedirá autorización ao TSXG para adoptar estas restricións a partir deste sábado, 24 de xullo.

CONCELLOS

Na mesma xornada, Feijóo apuntou que a Xunta eleva a sete concellos a nivel máximo de restricións debido á situación epidemiolóxica pola Covid-19, mentres que 29 estarán en nivel alto, o que supón o 35% da poboación. Así o anunciou este mércores o presidente da Xunta, Alberto Núñez Feijóo, que puntualizou que entre os municipios con nivel alto se inclúen as cidades de Vigo, Ourense e Pontevedra. Pola súa banda, o 65 por cento dos galegos seguirá en nivel medio ou medio-baixo.

FLEXIBILIDADE COA HOSTALARÍA

Na mesma xornada, coñeceuse que Galicia permitirá o acceso aos locais de restauración e hostalaría en zonas de nivel máximo --onde ata agora tiña que estar pechado-- e alto --onde non se podía acceder ao interior-- a persoas que presenten certificado de vacinación completa, que pasasen a enfermidade ou ben conten cun test negativo nas últimas 72 horas.

"SEGUIMOS SEN LEI"

Na súa intervención en rolda de prensa, e a preguntas dos medios, Feijóo explicou que os servizos xurídicos están a traballar polo momento na argumentación que acompaña estas medidas e que entre este mércores e o xoves se espera que cheguen aos tribunais.

Aínda que ata agora as decisións da sección terceira da sala do contencioso-administrativo do TSXG deron autorización a todas as medidas propostas pola Xunta e de forma rápida, as limitacións de reunións poderían entrar en vigor máis tarde que os requisitos da hostalaría se se demora a presentación na sala e o trámite xudicial, que tarda entre 48 e 72 horas.

"Impórtanos moito máis que estean fundamentadas a tardar unhas horas", esgrimiu o presidente autonómico, quen xustificou as novas medidas sobre a base da "incidencia dos novos casos".

Na súa intervención, Feijóo lamentou que as comunidades "seguen sen lei para xestionar a pandemia" e tomar as medidas, polo que seguen ao albur de que os tribunais de xustiza decidan autorizalas, o que dá lugar a "sentenzas contraditorias, aparentemente" nos distintos territorios. "Coa evolución do virus, é preciso tomar novas medidas", sinalou, pondo fincapé en facelo nos grupos que están sen vacinar.

"En definitiva, a evolución do virus está a ser mala e é preciso tomar novas medidas que afectan sobre todo a aquelas que teñen máis risco de contaxiar e de contaxiarse, que son as persoas menores de 40 anos. Sei que non son actuacións sinxelas nin agradables, e quero pedirlle desculpas por anticipado ás persoas que non podemos vacinar, (porque) é unha discriminación imposible de xustificar", sentenciou Feijóo.