Por E.P. | SANTIAGO DE COMPOSTELA | 21/07/2021 | Actualizada ás 15:52
Os peóns centran a primeira fase da campaña de seguridade viaria que a conselleira de Infraestruturas e Mobilidade, Ethel Vázquez, presentou este mércores, co obxectivo de "reducir a cero" as vítimas de tráfico.
A campaña, co lema "Mirar por min é mirar por todos", que forma parte do Plan de Seguridade Viaria 2021-2025, aspira a conseguir o "horizonte da redución ao mínimo posible das vítimas en accidentes de tráfico nas estradas galegas".
Vázquez recalcou o compromiso do Goberno galego co "reforzo da seguridade viaria". "Agora que podemos comezar a movernos con máis liberdade, sen restricións sanitarias, temos que evitar que aumenten os sinistros", engadiu.
Esta nova campaña constará de dúas fases. A primeira comezará este xoves, e irá encamiñada a concienciar aos peóns sobre os comportamentos preventivos que poden seguir: chalecos reflectores, camiñar por beirarrúas e sempre pola esquerda... A segunda, que comezará no outono, ten como obxectivo educar acerca de como afecta á condución os cambios climatolóxicos.
"A VELOCIDADE MATA"
Ademais da conselleira, no acto tamén estivo presente a delegada de STOP Accidentes en Galicia, Jeanne Picard, que lembrou a necesidade de adoptar medidas preventivas para evitar mortes ,e que "a velocidade mata".
Picard comparou á pandemia do coronavirus coa pandemia "do tráfico". "Se un adopta o distanciamento social e se lava as mans pola covid, tamén debe gardar a distancia de seguridade e non consumir alcol antes de coller o coche", sinalou.
A activista de orixe parisiense tamén tivo palabras de recordo para todas as vítimas de accidentes de tráfico e para as súas familias. En especial, para o seu fillo Santiago, quen faleceu o 1 de xaneiro de 2000 nun accidente, e que este mércores cumpriría 54 anos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.