Por Europa Press / Redacción | Compostela | 21/07/2021 | Actualizada ás 17:34
O conselleiro de Cultura, Educación e Universidade, Román Rodríguez, reclamou --no marco da Conferencia Sectorial de Educación, a primeira presidida pola nova ministra Pilar Alegría-- fondos específicos anticovid para educación e a contratación de profesorado no curso 2021-22.
Tras mostrar a súa satisfacción por esta convocatoria da Conferencia Sectorial nos primeiros días de Alegría como ministra, un órgano que "nos últimos tempos perdera, desafortunadamente, a súa relevancia", o conselleiro reclamou ao Goberno que informe xa as comunidades de se lles vai transferir fondos concretos para a contratación de docentes ante as necesidades da pandemia.
A este respecto, avisa de que os fondos procedentes do mecanismo europeo REACT-EU, tal e como manifestaron varias comunidades, non poden ser empregados para este fin.
Igualmente, lembra que o Goberno xa aprobou un protocolo anticovid para o próximo curso. "É necesario que se nos informe xa dos recursos adicionais cos que imos poder contar", sentenza Román Rodríguez. Por iso, pide que a próxima reunión coas comunidades sexa na data máis próxima para evitar problemas organizativos nos centros.
Paralelamente, o conselleiro de Educación requiriu ao Executivo central un esforzo adicional nos fondos da PROA+, cos que se financia o Plan Recupera, dado que denuncia que a asignación para Galicia é dun millón menos á indicada inicialmente.
FP E OUTROS TEMAS
Por outra banda, a Xunta demanda unha maior participación na elaboración da nova lei de FP, co fin de corrixilos defectos que, ao seu xuízo, presenta o anteproxecto e "que non se convirta nunha nova lei Celaá".
Solicita unha solución específica para que o alumnado que proceda de BUP poida continuar accedendo aos ciclos formativos, tras a derrogación da Lomce.
Xunto a isto, o conselleiro de Educación pide que se axilice a elaboración da normativa básica para os novos currículos adaptados á Lomloe, pois queda menos dun ano para que as autonomías deban telos aprobados.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.