O PSdeG ve a Feijóo como "o pasado de Galicia" e critica o seu discurso "infantil"
Arangüena valora o primeiro ano de lexislatura como "intenso" e pide á Xunta "máis diálogo".
Por Europa Press / Redacción | SANTIAGO DE COMPOSTELA | 22/07/2021 | Actualizada ás 15:51
O deputado do PSdeG e viceportavoz do Grupo Socialista, Pablo Arangüena, definiu ao presidente da Xunta, Alberto Núñez Feijóo, como "o pasado de Galicia" e criticou que a súa "inacción" e "falta de rumbo" manteñen á Comunidade galega "paralizada" e sen avanzar "cara ao futuro".
Arangüena criticou este xoves nunha rolda de prensa o abandono de funcións do Goberno galego "durante máis de dez anos". En especial, esixiu a Feijóo que exerza as competencias en materia industrial que a Xunta ten asignadas e que non deixe aos traballadores e empresas do sector "abandonados".
"Culpar a Pedro Sánchez e ao Goberno de todos os males é máis propio de réximes autocráticos que da rendición de contas dunha sociedade democrática", manifestou o portavoz socialista, que tachou de "victimista" e "infantil" o relato que o presidente galego "vende a todos os habitantes da comunidade".
O socialista asegurou que Galicia "corre o risco de quedar atrás" na continua evolución da sociedade, debido á inexistencia dun proxecto político de face ao futuro por parte do PP autonómico. A este respecto, Arangüena salientou en que este é o momento en que o Executivo autonómico debe pór a disposición dos galegos "todos os recursos dos que dispón a Xunta, que son abundantes".
PREOCUPACIÓN POLOS FONDOS
O vicesecretario xeral de Política do PSdeG tamén mostrou a súa preocupación pola xestión dos fondos 'Next Generation'. O socialista expuxo que, dos 354 proxectos anunciados pola Xunta, a oposición non ten constancia dunha gran parte, e dos que se, moitos xa estaban expostos antes da pandemia, e non cumprirían os requisitos para adherirse aos fondos europeos.
"Galicia debe utilizar o diñeiro dos 'Next Generation' e os 1.800 millóns de euros facilitados polo Estado para salvar vidas, e non para cadrar contas", afirmou Arangüena, que contrapuxo a "Feijóo como o campión do austericidio" con "o momento actual, que esixe novas formas de facer política e non encher as arcas da comunidade".
ANO INTENSO
O viceportavoz do Grupo Socialista valorou o primeiro ano de lexislatura como "intenso", e pediu á Xunta "máis diálogo". "Durante este ano presentamos 1.385 proposicións non de lei e mocións, das cales só foron aprobadas 53", recoñeceu, a pesar de que "ían encamiñadas a recuperar os servizos públicos e a facer fronte á pandemia".
Ademais, destacou as 333 propostas "concretas" que os socialistas levaron á Comisión de Reactivación, das cales se incorporaron "algo menos do 15%". "O PSdeG non entende esa actitude do PP", engadiu Arangüena, "porque, a diferenza doutras forzas, nós facemos propostas serias e viables", finalizou.
