Por Europa Press / Redacción | SANTIAGO DE COMPOSTELA | 25/07/2021 | Actualizada ás 11:02
Un mozo de 16 anos de idade necesitou a axuda dos equipos de emerxencia a tarde-noite do sábado, despois de precipitarse desde un cuarto piso dun edificio en ruínas, no municipio coruñés de Narón.
Pasadas as 21,30 horas, un particular contactou co 112 Galicia para solicitar axuda para un amigo que acababa de caer polo oco do ascensor dun edificio abandonado. O mozo indicou tamén que a caída se produciu desde unha altura dun cuarto piso, na rúa Mandeo.
O edificio por cuxo oco do ascensor se precipitou o menor de 16 anos levaba anos valado perimetralmente. As obras do inmoble paralizáronse no seu momento coa estrutura finalizada.
Segundo a información solicitada por Europa Press, o mozo caeu polo oco do ascensor desde a cuarta planta tras saltar o valo para acceder ao edificio en compañía de dous amigos.
Os operadores do CIAE-112 Galicia déronlle o aviso aos Bombeiros da localidade, á Policía Nacional e Local e aos servizos sanitarios. Ao lugar dos feitos acudiu tamén o Servizo de Prevención, Extinción de Incendios e Salvamento de Narón (Speis).
Finalmente, a dotación de Bombeiros de Narón, desprazada ata o punto para socorrer ao mozo, indicou que rescataron ao menor do oco do ascensor no que se atopaba e que foi trasladado, polo persoal sanitario, ata o Complexo Hospitalario Universitario de Ferrol.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.