Por Europa Press / Redacción | SANTIAGO DE COMPOSTELA | 26/07/2021 | Actualizada ás 19:51
O Partido Popular do Grove manifestou a súa "fonda preocupación" pola repercusión que para a hostalaría da localidade poden significar as medidas de control da propagación do coronavirus aprobadas pola Xunta de Galicia.
O municipio turístico do Grove é un dos sete que están en nivel máximo de restricións pola incidencia da Covid, polo que a hostalaría só pode servir no 30% do seu interior e na metade das súas terrazas, mentres que pubs e discotecas poden servir tamén no 50% das súas prazas no exterior, sempre que se acredite estar inmunizado. Están prohibidas as reunións entre non conviventes de 1 a 6 horas e deben ser dun máximo de 10 persoas en exterior e seis en interior.
A través dun comunicado, os populares grovenses aseguran que "a hostalaría e o lecer nocturno no Grove son seguros" e que "non hai ningún sector que durante a pandemia fose tan estigmatizado e sobre o que recaese unha acumulación de medidas que parecen non ter fin".
Aínda así, engaden, nun momento en que a poboación de risco xa ten a pauta completa e estando nuns rexistros hospitalarios e de ocupación de UCI "moi distintos" aos do principio da pandemia, "seguen sendo o único sector onde parecen centrarse as medidas e as críticas, mentres pagan impostos, alugueres, ou a luz coma se traballasen ao 100%".
O Partido Popular do Grove descarta "absolutamente" que a hostalaría sexa o problema, polo que entenden que a necesidade de probas PCR ou certificados de vacinación, así como reducir o aforamento nas terrazas, "son medidas que non están xustificadas, son desproporcionadas e discriminatorias de cara ao sector".
INDIGNACIÓN CON SANXENXO
Tamén lembran os populares grovenses que "comportamentos arbitrarios" como o que cren que se tivo co Concello de Sanxenxo, manténdoo hai un par de semanas nun nivel medio cunha incidencia que superaba a do resto de municipios da comarca, "non fan mais que contribuír á indignación do sector da hostalaría" no Grove.
Sobre o señalamento aos mozos como causantes desta nova onda, o PP do Grove apunta que "é un erro pensar que os mozos van ir durmir polas restricións do lecer nocturno". "Seguirán socializando", indican, á vez que sinalan que se puido comprobar que optaron por "reunirse nas casas ou nas rúas, sen máscaras e sen distancia, tal e como os veciños puideron testemuñar estes días". O PP do Grove pide á Xunta que atenda as solicitudes presentadas polas asociacións de hostalaría e mude as súas posicións.
NON SON POLICÍAS
Así mesmo rexeitan que se derive o control e a solicitude de certificados sanitarios aos propios hostaleiros nun momento en que a suma de falta de persoal, nalgúns casos aínda con ERTE, "implica unha presión inaceptable sobre os traballadores dun sector que non son nin inspectores sanitarios nin policías".
Conclúen o seu comunicado os populares grovenses asegurando que a súa "única preocupación e responsabilidade é cara os veciños e veciñas do Grove, e a defensa dos seus postos de traballo e negocios".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.