Por Galicia Confidencial | SANTIAGO DE COMPOSTELA | 27/07/2021 | Actualizada ás 15:00
O Consello Económico e Social de Galicia (CES) vén de facer pública a súa Memoria sobre a situación económica e social de Galicia 2020, un informe anual que, desta vez, chega máis ben como un exame ao tecido produtivo galego tras o paso da pandemia da covid e as súas devastadoras consecuencias. O estudo chama a atención sobre o incremento da desigualdade entre os galegos, a problemática do envellecemento do rural e dá certos consellos non moi acordes á política económica da Xunta de Galicia.
Mentes o executivo de Núñez Feijóo insiste en concentrar os seus esforzos no rendemento económico do Xacobeo, o ente presidido por Agustín Hernández --exconselleiro de Medio Ambiente e alcalde fugacísimo de Santiago polo PP-- insta directamente ás autoridades a
impulsar unha nova economía de maior produtividade e máis futuro.
Así, o CES chama a atención sobre a oportunidade que este escenario de “profundas transformacións” ofrece para “impulsar o cambio a un sistema produtivo máis tecnolóxico, innovador e sostible, xerador de crecemento económico e emprego de calidade”. Unha receita que choca de fronte coa estratexia da Xunta de Galicia de potenciar o Ano Santo, actividade dobremente estacional --porque o pulo se concentra nos meses do verán e, á parte, nin sequera é todos os anos-- e que queda enfocada, sobre todo, en traballos derivados do turismo e a hostalaría, considerados na investigación económica como sectores servizos de baixo valor engadido por antonomasia; é dicir, emprego de baixa calidade.
O ditame do CES, elaborado por unanimidade no seu Pleno, ten carácter puramente consultivo, polo que a Xunta decidirá se toma ou non en consideración os consellos recollidos no documento, xa accesible ao público. O informe fai tamén fincapé no incremento das desigualdades que tiveron lugar por mor da pandemia en Galicia, unha circunstancia que vai paralela ao aumento do desemprego e o “deterioro” das contas públicas, aínda coas “medidas de choque postas en marcha polos distintos gobernos”.
ENVELLECEMENTO DO RURAL
A outra pata que abanea na economía galega non é outra que o envellecemento estrutural da poboación, unha circunstancia que pon moi difícil a sustentabilidade dun sistema de pensións de solidariedade interxeneracional como o que actúa en España sen depender da redistribución do Goberno central. O CES destaca que a problemática do envellecemento se concentra no eido rural, razón pola cal urxe a realizar políticas “dirixidas a cambiar esta situación a través do fomento da natalidade”, entre outras receitas
Finalmente, o Consello sostén que a pandemia tamén puxo en evidencia a “necesidade de protección e conservación da natureza”. “O cambio climático e a perda de biodiversidade xeran elevados custes económicos e sociais e agravan os riscos sanitarios; de aí a necesidade de protexer o medio ambiente, entre outras, potenciando a economía circular”, engaden.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.