Unha trintena de positivos nas escolas infantís, que suman 16 aulas pechadas en 25 centros

Unha gardaría municipal de Sanxenxo detecta tres positivos entre os nenos e un dunha docente, que levou a clausurar unha clase.

Por Europa Press / Redacción | SANTIAGO DE COMPOSTELA | 27/07/2021 | Actualizada ás 14:19

Comparte esta noticia

As escolas infantís de Galicia concentran unha trintena de casos positivos de Covid-19, entre nenos e persoal docente, e 16 aulas pechadas en 25 centros afectados.

Así se desprende dos datos facilitados este martes pola Consellería de Política Social a Europa Press, nos que se indica que hai 25 escolas infantís afectadas, que concentran 21 nenos contaxiados e oito traballadores, que están en illamento nas súas casas.

Política Social, que xestiona as escolas infantís, destacou que na actualidade non hai ningún centro pechado pola incidencia da Covid-19 en Galicia.

As 16 aulas pechadas distribúense en 11 municipios das catro provincias galegas. En concreto, na coruñesa hai cinco clases clausuradas en centros de tres concellos: A Coruña (3), Culleredo (1) e Sada (1).

Na provincia de Pontevedra hai aulas pechadas en escolas infantís do municipio da Estrada (3), Sanxenxo (1) e Mos (1), segundo as mesmas fontes da Xunta.

Polo seu lado, na provincia de Lugo as aulas pechadas en escolas infantís localízanse nas localidades de Burela (1) e Lugo (1); mentres que na ourensá sitúanse na Rúa (1), O Barco de Valdeorras (1) e Ourense (2).

ESCOLA MUNICIPAL

Pola súa banda, fontes municipais informaron do peche dunha aula de 1-2 anos na Escola Infantil Municipal O Tombo, en Sanxenxo, debido ao positivo de tres nenos e unha profesora.

As mesmas fontes municipais puntualizaron que ao resto de nenos da aula "practicaráselle a PCR e terán que gardar corentena por ser contactos estreitos".

Nesta localidade pontevedresa, segundo datos de Policía Social, hai ademais outra aula pechada debido ao positivo de dous traballadores e un alumno na Escola Infantil Pequerrulos.

Escola infantil. CONCELLO DE XETAFE
Escola infantil. CONCELLO DE XETAFE

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta