Pablo Nogueira gaña o premio de literatura infantil e xuvenil Pura e Dora Vázquez na modalidade de narración
O xurado destaca a súa "perspectiva inclusiva e que dá visibilidade á diversidade funcional entre a infancia".
Por Europa Press / Redacción | OURENSE | 29/07/2021 | Actualizada ás 18:51
O escritor Pablo Nogueira Campo --O Carballiño, 1987-- gañou o XVIII Premio Pura e Dora Vázquez na modalidade de narración, galardón de literatura infantil e xuvenil que concede a Deputación de Ourense, coa súa obra 'O clube de coleccionistas de selos'.
O xurado destacou "a súa perspectiva inclusiva e que dá visibilidade á diversidade funcional entre a infancia", unido á súa "posta en valor do medio natural, así como a figura do avó e as relacións interxeneracionais". O premio está dotado con 1.500 euros.
Igualmente, o xurado remarca que é un texto con "unha escritura moi coidada, na que emprega moitas referencias a personaxes históricos e literarios, o que promove a posibilidade de diversificar os itinerarios de lectores e o fomento da lectura". Por iso, convértese en "un bo recurso literario para profesores e o seu traballo na clase".
O xurado, presidido pola deputada de Cultura da Deputación, Patricia Torres, estivo formado por David Canda, Antón Alonso, Xosé Antón Dorrio, Isabel Mociño, e Ana Malingre.
Pablo Nogueira estudou Maxisterio na Universidade de Santiago e actualmente é profesor de Audición e Linguaxe no ensino público. Licencidado en Psicopedagoxía, conta cun máster na USC en 'Investigación en educación, diversidade cultural e desenvolvemento comunitario'.
Previamente a este galardón, publicou dúas novelas curtas para o público adulto: 'Banda Sonora Orixinal' (Fervenza, 2019), obra gañadora do IV certame Balbino de relatos, e 'Música para os días de inverno' (Laiovento, 2020).
