O conselleiro de Sanidade comparecerá no Parlamento para explicar a xestión da quinta onda

O conselleiro de Sanidade, Julio García Comesaña, comparecerá nun pleno extraordinario para explicar a xestión da quinta onda da pandemia de coronavirus, tras aprobalo a deputación permanente por unanimidade a petición do BNG. Por parte do Bloque, a deputada Montse Prado remarcou que "a comparecencia do conselleiro (de Sanidade) é máis que precisa" para "explicar" os "datos preocupantes" da quinta onda.

Así, a nacionalista incidiu en que Julio Comesaña debería explicar outras cuestións como "por que non hai rastrexadores en número suficiente", a situación dunha atención primaria "totalmente colapsada", a autocita para adolescentes e en suma "a descoordinación" en canto ás medidas para combater a crise sanitaria.

Por parte do PSOE, o deputado Pablo Arangüena chamou a non "descoidarse" porque o virus pode experimentar "mutacións perigosas", a pesar de que España está a ser dos países "que máis vacina" e con "máis porcentaxe de poboación vacinada", aínda que "Feijóo dubidaba do éxito". Con este "campo abonado para futuras mutacións", reclamou "reforzar" o sistema de rastrexo e de saúde pública e mostrouse preocupado ao saber "que o goberno do PP pechou 600 camas, que non se cobren as baixas, que hai un déficit crónico de pediatras e que os centros de saúde están desbordados", entre outras cuestións.

O portavoz parlamentario do PPdeG, Pedro Puy, rexeitou "ter un debate sanitario" nesta reunión da deputación permanente e, sobre a petición dun pleno extraordinario para que compareza o conselleiro, dixo que cre "que é bo que veña o conselleiro a ver se esta vez son capaces (os grupos da oposición) de recoñecer a capacidade de xestión" do Goberno galego, e tamén en aras da "transparencia" do Executivo.

"A Xunta está a xestionar esta quinta onda creo que con acerto", replicou ás críticas, antes de enumerar algunhas das medidas adoptadas. Aínda que indicara que, ao seu xuízo, "o razoable sería esperar ao fin do ciclo epidemiolóxico (...) para que o conselleiro comparecese nesta Cámara", finalmente o PP votou a favor.

O conselleiro de Sanidade no Parlamento galego. Xunta de Galicia | Fonte: Europa Press