Critican a Xunta por "beneficiar as farmacias" ao permitirlles expedir certificados de test negativos
Satse tamén denuncia que as oficinas de farmacia poidan integrar os resultados nos rexistros do sistema público de saúde.
- Denuncian que o desenvolvemento da carreira profesional "discrimina" a enfermeiros e fisioterapeutas
Por Europa Press / Redacción | SANTIAGO DE COMPOSTELA | 30/07/2021 | Actualizada ás 15:05
O sindicato de enfermaría Satse ve unha "nova agresión á sanidade pública" coa finalidade de "beneficiar as farmacias" o acordo para que as boticas poidan expedir documentos acreditativos de resultado negativo do test de autodiagnóstico de Covid-19. Nun comunicado, o sindicato pregúntase "por que o conselleiro de Sanidade ten tanto interese en chegar a acordos co sector privado farmacéutico cando ao final non funcionan".
"Señor conselleiro, vostede cre que o farmacéutico vai estar presente cando o cidadán se realice o auto-test?, vostede cre que as boticas están preparadas para atender, vixiar e autentificar ditas probas? Sentímolo, pero o Sindicato de Enfermaría sabe que pasará o mesmo que cos certificados Covid-19", sinala. Satse xa se mostrou en contra de que as farmacias puidesen expedir o certificado Covid-19 e cren avalado o seu rexeitamento en que o Sergas puxo dispositivos fóra dos centros de saúde para que o seu persoal dispense estes certificados.
O Sergas vai estender a 14 distritos sanitarios os puntos móbiles para realizar test de antíxenos, e tamén entregará nesas carpas os certificados que se necesitan para acceder a espazos como a hostalaría en concellos en risco alto ou máximo. Ese certificado informará de se se pasou a enfermidade, se se recibiu a dobre dose da vacina ou os resultados do test de antíxenos ou PCR.
DATOS DE PACIENTES
Satse está en contra tamén de permitir que as oficinas de farmacia poidan acreditar a validez dos resultados das probas diagnósticas da Covid-19 que venden e integrar os seus resultados nos rexistros do sistema público de saúde.
Neste sentido, o sindicato recalca que toda a información sobre os pacientes pertence ao sistema sanitario público, téndose que salvagardar, en todo momento, a protección de datos clínicos e datos persoais. "Nunca e baixo ningún concepto, debe realizarse en establecementos privados cuxa principal función e servizo á sociedade é vender medicamentos e outros produtos comerciais", sostén.
